PDR tabata cla y raspa cu su mocion cu a wordu acepta unanimamente den Parlamento di Aruba na unda PDR ta pidi pa forma un comishon pa asina sondea e posibilidadnan di un posibel cumprado of interesado(nan), pa por logra re-apertura di e refineria na San Nicolas.
Algun parlamentario di AVP a critica lider di PDR tur sorto di forma y a aparenta di no tabata kere den re-apertura di e refineria, asina mes cu nan a sostene e mocion.
Sinemabargo, despues di e combersacionnan entre nan propio minister encarga cu energia y gerencia di Citgo na Houston siman pasa, un carta a bay pa Valero, doño di e refineria na San Nicolas.
Segun Minister President tin varios forma disponibel ainda pa tuma pa un re-apertura di e refineria.
Entre e posibilidadnan, e refineria por wordo otorga directamente na Valero of na pais Aruba cu na su turno por lease esaki na Citgo.
Si e re-apertura di e refineria sosode cu un maneho mas ‘sostenibel‘ y duradero y inclui traspaso di pidanan grandi di tereno bashi y no usabel bek pa Aruba e decision pa un reapertura lo ta mucho mas facil, Minister President a finalisa bisando.
Nos di PDR ta spera awo cu es Parlamentarionan di AVP cu a critica nos lider y a desprecia su esfuersonan pa cu re-apertura di e refineria, porfin lo por uni na e lucha pa re-apertura, despues cu nan propio lider sr. Mike Eman a biaha bay te Hulanda riba e tema y awo ta convenci di e balor agrega di re-apertura di e refineria.
Nos di PDR en todo caso lo sigui cu e lucha pa un re-apertura di e refineria conforme e mandato electoral cu nos a haya basa riba nos programa di partido.

Expresionnan haci den e articulo aki no necesariamente ta refleha opinion di ArenaPoliti.co