Dia 27 di augustus 2015 a marca un dia historico scur pa nos Pueblo.
UPP ta di opinion cu na prome lugar gobierno lo por a premira cu accion contra e ley di CAft lo tabata na ordo di dia pa e hecho cu cueste loke cueste gobierno di AVP a dicidi di pusha pasamento di e ley na un manera hopi dictatorial.

Tambe ta e opinion di UPP cu si sano huicio y sensatez politico a prevalese, e culminacion di e anochi turbulento aki lo no tabata necesario si e Presidente di Parlamento lo tabata tin e decencia pa atende cu e grupo di manifestantenan.
Mirando e sucedido di e dia aki, UPP kier a haci algun pregunta publico na tanto Presidente di Parlamento como na Prome Minister relaciona cu uzo di materialnan y propiedad publico cu metanan of finnan politico.
Aki UPP ta referi specificamente na camaranan di seguridad rond di Parlamento.

Segun nos informacion na luna di october 2014 a laga pone un set di camara di seguridad rond di Parlamento. Preguntanan cu nos tin ta:
- kende a laga pone e camaranan di seguridad aki?
- bou di cua instancia nan ta cay?
- ken ta controla e camaranan aki?
- ki protocol tin den e caso cu e camaranan aki mester wordo uza pa ministerio public, y pues cuerpo policial?
- kendenan tin acceso na e imagennan aki?
- E camaranan aki ta cay bou responsabilidad di Parlamento of di Gobierno, mescos cu cualkier negoshi?

E preguntanan aki ta relaciona cu e hecho cu na momento un ciudadano, sea e ta AVP of MEP, loke aparentemente a bira un discusion, ta wordo gara riba e camaranan ta uzando “pepperspray”.
Riba su mes e camaranan aki por sirbi pa bringa criminalidad y tambe na momento cu Ministerio Publico ta haya necesario pa haci un investigacion, incluso ora di protesta of manifestacion, pero nos di UPP, considerando e derecho riba privacidad, ta kere cu e imagennan aki mester keda den man di hendenan drechi, serio y competente.
P’esey nos pregunta na Presidente di Parlamento y Prome Minister ta tambe, dicon despues di e acto aki, cu nos di UPP no ta aproba, imagennan y potretnan ta sali den un rato di tempo riba “social media” y ta bira “viral”.
Es mas, hasta riba e mesun anochi nos por a observa cu Tele-Aruba a hasi uso di videonan di e camaranan di seguridad di Parlamento.
Na e mes un momento e presentador di e noticiero di TeleAruba a haña ta bon pa duna comentarionan yena cu un tinte politico, ta duna nomber y ta bay over na stigmatisa e ciudadano como “un mepista di Santa Cruz”.
Nos ta puntra, na vispera di “Dia di Prensa”:
- kico ta e standard cu medionan di comunicacion ta sigui ora di sin mas bay publica e informacion aki?
- mirando e imagennan cu ta di un calidad hopi halto, nos pregunta ta pa ken y pa kico e tiponan di camaranan aki a wordo poni? Pa combati criminalidad? Of pa controla y intimida ciudadanonan cu kier bin protesta y asina por persiguinan politicamente?
- Si encaso cu ta personanan drechi, serio y competente ta dirigi e camaranan aki, nos pregunta ta, con e imagennan aki por a yega den man di diferente medianan social, Tele Aruba, ATV y Tera Group?
- Si tin un protocol den e caso aki, investigacion lo wordo haci pa wak kende ta esnan cu a facilita e media social e imagennan aki?

UPP kier a enfatisa, cu nos ta aproba uzo di e camaranan dor di polis cu fin pa vigilancia pa actonan criminal, pero no por ta asina cu ta sin mas, sin investigacion ni nada, e imagennan ta wordo facilita pa haci wega politico cu nan, mencionando nomber, bario, cu ken e ta casa, etc. Un biaha mas, kico ta para cu e privacidad di nos Pueblo? Nos ta kere cu tipo di actonan asina ta hiba cu nos ciudadanonan ta sinti nan mes intimida y ta crea mas bien rabia, cu tur e consecuencianan.

UPP ta kere cu tipo di accionnan asina ta demostra cu nos ta bibando den un estado fascista. Exactamente manera nos a conoce den añanan 1933 – 1945 na Alemania, den e epoca di e nazinan dirigi pa e narcista Hitler, pero den un manera mas sofistica awendia.
Y aki ta unda cu ta trata hustamente pa sigui contribui na e cultura di medio. Awe ta culpa esnan cu a destrui edificio di Parlamento, pero de facto nos por mira cu ta placa di belasting ta wordo uza pa pone tipo di camaranan cu e meta pa uza esaki na momento di un demostracion y ta presenta na prensa potretnan "kant en klaar" pa wordo uza pa asina por manipula opinion publico.
Nos tin informacion caba cu e prome represaya lo a cay, ya cu un trahador no mag drenta Bestuurskantoor mas riba orden di su hefe, pasobra nan a wak e ta manifesta den su ora liber.
P’esey tin e camaranan di seguridad aki pa asina tin persecucion politico?
Aruba y Arubianonan, Quo Vadis?

Den nomber di Union Patriotico Progresista – U.P.P.
Candelario A. S. D. Wever
Brazil, september 1, 2015

Expresionnan haci den e articulo aki no necesariamente ta refleha opinion di ArenaPoliti.co