STA. CRUZ - Ley di CAFT ta resultado di mal maneho financiero di ultimo 5 anja y no desde 1986.
Despues cu Mike Eman a core cu Mike de Meza y Juancho como minister di Finanzas pa nan incapacidad pueblo a spera un cambio real na momento cu, ariba recomendacion di Hulanda, Sr Bermudez a keda apunta como minister di Finanzas! Pakiko? Pasobra Sr Bermudez ta un professional, cu no a participa activo ariba ningun lista politico y incluso a bisa cu ultimo eleccionnan no a vota mes akinan!
Sr Bermudez a traha pa gobierno di Reino na Boneiro y ta wordo considera un hende di confiansa di gobierno hulandes! Speransa di pueblo tabata cu Bermudez, como outsider, a lo menos lo a demostra curashi y bin hasi un trabou y cambia e rumbo robes den nos situacion financiero y e chaos cu nos pais ta pasando aden desde November 2009. Lamentabelmente Bermudez no a logra caba cu e ‘adiccion’ di malgasta placa di su coleganan minister na prioridadnan robes, complace compinchinan, famianan y amigonan di partido AVP cu privilegio y contratonan cu ta hole na corrupcion. E prome fout cardinal di Sr Bermudez tabata di accepta e ‘plafond’ di gasto di 1.350 miyon den presupuesto. Na prome lugar nos economia no ta produci e entrada ey pa caha di gobierno! Esaki ta trece cune cu nos ta keda cu un buraco/deficit den nos presupuesto y nos pais tin cu sigui fia placa, hopi placa, pa cubri esaki! ‘Je rekent jezelf rijker dan je bent’ hulandesnan lo bisa! Ariba dje su coleganan minister no a tene nan mes den cuadro di nan presupuesto y como resultado 2014 a sera cu un gasto total di ariba 1.400 miyon florin. Asina nos a sigui lora den e spiral di ‘overspending’ cu atrobe mas deficit den 2015, mas fiansa cu mas interest pa paga! E vision di Mike cu si economia crece esaki automaticamente lo trece mas placa aden pa baha deficit y paga debe tambe a resulta un di su hopi fabulanan!

E storia mientras tanto ta conoci! Bou presion di Hulanda Mike Eman a hanje ta firma un protocol dia 2 mei ultimo! E ley di CAFT cu 13 parlamentario a pasa y traiciona pueblo diahuebs ultimo a pone Mike Eman y su gobierno ‘bou curatela’ di Hulanda pa medio di e comision di CAFT! Den e comision di CAFT Aruba tin 1 miembro cu no tin mucho di bisa pasobra e ta den minoria! Ora Cu Sr Bermudez bisa cu e ley di CAFT ta un ley di maneho e ta ‘papia mitar berdad’ pasobra ta bou quia (strenge toezicht)di e comision di CAFT gobierno lo mester bai demostra cu e por traha y mantene su mes na normanan y margennan di presupuesto manera palabra! Corda cu bou presion Mike Eman mester a traha un lista di 24 medida cu cual mester a convence Hulanda cu di awor padilanti nos lo bai pone ordo den e chaos financiero tambe ta resultado di e protocol di 2 di mei. Algun di e medidanan ja a cuminsa wordo ehecuta caba! Y ainda falta! Manera aumenta e BBO te na 3.5% pa medio di BAZV pasobra Mike Eman tin ‘fobia’ di e palabra BBO.
Asina mes Gobierno di Reino(Hulanda) no a confia Mike Eman su palabra y a menasa cu si no bin algo concreto lo impone un medida di ordo(AmvRb) ariba gobierno di Aruba! Cu esaki pone Aruba, mescos cu Corsou y St Maarten, cai directamente bou di e comision di CFT. Ariba peticion, plegaria y promesa di Sr Eman Hulanda a bai di acuerdo pa Aruba mes instala un CAFT cual ta un ruman di CFT, pero domina pa e comision di CFT. Por pensa cu Hulanda a bai di acuerdo cu introduci e ley di CAFT pa complase Mike Eman pero impone e CFT direct ariba Aruba lo trece cune un discussion ariba ‘schuldsanering’ mescos cu Corsou y St Maarten a hanja na 2010. Esey ja Minister Plasterk a bisa miembronan di 2e kamer cu pa awor esey lo no papia mes di dje!

Otro mitar berdad di Sr Bermudez den su declaracion e ta bisa cu e maneho financiero malo cu Aruba ta aden ta consecuencia di mal maneho desde anja 1986. Ta gobierno di Mike Eman 1 y 2 a base di un maneho malo den apenas 5 anja a redobla un debe di 2.1 biyon te na 4.2 biyon! Den apenas 5 anja compara cu 23 anja desde Status Aparte! Awor ta resulta cu e maneho laga atras na 2009 pa gobierno di MEP, bou maneho di Sr Nilo Swaen, tabata masha bon! Pasobra awe e mesun CFT ta indica cu si gobierno hiba un maneho drechi di awor padilanti lo dura te anja 2034 pa jega bek na e situacion di 2009. Si gobierno keda nenga cu situacion ta malo nunca cos lo drecha!

Expresionnan haci den e articulo aki no necesariamente ta refleha opinion di ArenaPoliti.co