CAFT siman pasa a publica e rapport riba e presupuesto preliminario di 2016 di pais Aruba. CAFT ta yega na e conclusion cu e entradanan di gobierno ta mucho halto y e gastonan ta muchi abou. Cu esaki por conclui cu e conseho di CAFT riba e presupuesto 2016 di gobierno di Mike Eman a wordo desbarata.
Y ora bo pensa cu gobierno di Mike Eman a sinja su les di anja pasa, bo ta mira net contrario. Pasobra en bes di carga nan responsabilidad, en bes di tuma e asunto aki na serio, gobierno di Mike Eman ta bagatelisa e rapport di CAFT, y ta bisa cu loke CAFT ta bisa NO ta berdad.

Minister di Finansas Bermudez a declara cu CAFT por conseha cuanto cu e kier, pero CAFT no por pidi nada! Sinembargo segun e let di CAFT cu e propio Bermudez y partido AVP a manda parlamento, CAFT por pidi hasta un aanwijziging, un KB! Segun e ley ey mes, gobierno ta compromete su mes cu sigi e consehonan di CAFT, sino atrobe ta bin e drama cu a condusi na e welga di hamber di ensure di Mike Eman anja pasa.

Tambe minister di finansas Bermudez a declara cu no ta berdad cu gobierno di AVP a tene informacion atras di CAFT; nan a duna CAFT duna varios documento, pero CAFT no ta haya cu nan ta sincronisa cu otro, segun CAFT. Minister Bermudez mesora a reaccion y splica cu nan no por duna informacion, pasobra no tin cifras. Pero cu e no ta culpa di gobierno! Increible con nan ta purba manipula. Ta ken su responsabilidad esey ta anto? Ta e gobierno di Bermudez mes a goberna pa 6 anja y nunca a produsi cifras. Ken su culpa esey ta? Di CAFT? Di pueblo? Di MEP? No, pasobra tempo di MEP tabata tin cifras y tabata tin maneho drechi y responsabel. Tempo di MEP no tabata tin KB ni CFT.

Minister di finansas a reacciona tambe riba e acusacion cu e presupuesto NO ta realisitico, bisando cu e si ta haya e presupuesto realistico. Esey ta mesun cos cu Juan David Yrausquin, ex minister di finansas a declara apenas un anja pasa! Un cos ta obvio: e gobierno aki NO ta sinjando di su erornan, y unico cos cu ta hasiendo ta bula pipa. Ta tempo pa e gobierno aki asumi su responsabilidad, y stop di bula pipa, sino e sigiente aanwijziging, KB of maatregel ta wordo traha mesora. Pueblo di Aruba no merese pasa den e berguensa aki un biaha mas, pueblo di Aruba a wordo humiya demsiado caba, y merese mihor.

Expresionnan haci den e articulo aki no necesariamente ta refleha opinion di ArenaPoliti.co