Diamars mainta miembronan di fraccion di MEP a hasi un recorrido den caya Betico Croes bishitando comerciantenan y trahadornan cu ta labora den centro di cuidad. Pa fraccion e tawata importante pa tende e opinion relaciona cu introduccion di parkeermeters. Den e siguiente alineanan nos lo describi testimonionan pa pueblo.

Ta asina cu a cuminsa cobra riba dialuna cual pa cierto comerciantenan ta e dia cu mas hopi ta bende cual efecto den nan benta a wordo sinti dibiaha. Paga pa parkeer obviamente ta caba di stroba e trafico di cliente pa yega na nan negoshi. E introduccion di parkeerzone obviamente enbes di structura cosnan den Caya Betico Croes ta percurando pa un desaroyo negativo pe negoshinan.

Parlamentario Xiomara Ruiz-Maduro tambe a combersa cu varios comerciante y trahador. E la duna di conoce lo siguiente" Tin hopi preocupacion. Hopi ta cobra salario minimo y 900 pa aña ta un suma hopi halto pa nan. Hopi tin miedo di parkeer nan auto lew y ta teme cu asina por wordo vandalisa. Tin cu ta haye un bon idea pero ta decepciona cu e manera con e ley a wordo implementa. Ya cu gobierno a priminti cu lo bin parkeergarages pero esaki nan no a bin. Comerciante ta preocupa si esaki lo afecta nan benta mas cu ya e ta. Nan ta warda diasabra awor pa por midi con e acohida ta. Esaki ta algun feedback cu nos a haya."

Parlamentario Guillfred Besaril a vocifera lo siguiente di e recorrido den Caya Betico Croes: "Despues di a cana den nos caya principal y a combersa cu varios di nos comerciantenan, ta duel mi di tende di nan mes un boca cu den e 2 dianan aki cu a introduci parkeermeters nan benta a cay cu 70%. Banda di esaki e comerciantenan ta preocupa pa nan empleadonan ya cu nan mester paga 75 florin pa luna (900 Florin pa aña) pa por para den centro di ciudad. Esaki ta un gasto adicional cu hopi no por carga. E gobierno aki a pone hopi peso riba e comerciante y awo e empleadonan tambe ta victima!"

SOLUCIONNAN
Parlamentario Evelyn Wever-Croes a duna di conose cu Fraccion di MEP lo sigi cu e bishitanan aki y den combersacion cu esnan mas afecta, lo presenta e solucionnan pa e problemanan. “E problemanan ta serio, hendenan ta hopi hopi rabia y desgusta. Ya caba caya Betico Croes no tabata tin casi actividad, y awor ta teme lo peor. Mi mester bisa cu hopi di e problemanan cu nos a scucha awe, nos a alerta gobierno di nan, y nos a urgi gobierno pa duna atención, pero esaki no a pasa. Nos lo sigi cu e encuentro y bishitanan aki pa asina hunto cu cliente, empleado y comerciantenan yega na e mihor solucion pa caya Betico Croes”.

Realidad ta cu fraccion di MEP a constata cu e forma di introduccion di parkeermeters no tawata na agrado di mayoria di comerciantenan y trahadornan den caya. Importante pa enfatisa riba dje ta cu e accionan di Gabinete Eman no ta duna un estimulo real pa e negoshinan draai den Oranjestad. Partido MEP ta
convenci cu mester bin otro forma pa regula trafico y pa regla parqueo drechi den centro di cuidad. Mester STIMULA actividad den centro di cuidad y NO CABA cu actividad den caya Betico Croes, tawata palabranan di lider di MEP sra. Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co