ORANJESTAD – Diabierna mainta a firma contracto cu stakeholdernan cu ta establece un oficina den Edificio Multifuncional na Noord (MFA-Noord) y Ministerio di Asuntonan General bou encargo di Minister di Asuntonan General, Mike Eman. AZV, MedLab, Aruba Bank y Calloway ta bay brinda servicio for di MFA-Noord  pa aproximadamente 20 mil habitante di e districto for di e MFA aki.

MFA-Noord ta e prome Edificio Multifuncional cu a keda completa, for di un serie di 5,  cu ta cede di Hulpbestuurskantoornan, pero tambe otro servicionan importante y paticular pa e districto. Tambe e MFA tin infrastructura pa duna les y eventonan cultural.

Prome cu e acta firmamento a tuma luga, Prome Minister Eman a expresa su satisfaccion grandi cu e MFA ta cla y den operacion completo. “Esaki ta un momento di hopi satisfaccion pa mira cu un vision cu nos a pone nos dilanti na momento cu nos a dicidi di crea e espacionan nobo aki pa servicio di barionan, poco-poco ta haya e contenido tambe.”

E edificionan aki, segun a ser bisa, a wordo construi pa ubica Oficinanan Auxiliar di Gobierno den un edificio cu ta acomoda tanto e clientenan pero tambe e trahadonan, den un forma mas placentero. Na su yegada na MFA Noord, e mandatario a combersa cu diferente ciudadano kendenan a expresa di ta masha contento cu e espacMFA cu ta uno hopi agradabel pa haci nan pagonan of cumpra algo di come.

For di fase di planciacion caba, a segura cu e mester inclui servicionan comunitario, servicionan cu ta importante pa tin den e bario, y esaki ta cumpliendo cu nan tambe.

Gobierno, por medio di Prome Minister Eman, a firma e contract di espacionan cu ta wordo gehuur cu: Aruba Bank; Calloway (cafetaria); MedLab (Servicio di Laboratorio); AZV y Servicio di Impuesto. Pero tambe tin pendiente un oficina di sicologo pa mucha.

“Mi kier a felicita e empresa y institutonan cu a tuma e reto pa bay den bario y duna un miho servicio. Despues nos ta bay pa Paradera, Savaneta, Sta Cruz y San Nicolas,” e mandatario a señala y a gradici e team di MFA cu ta haciendo un tremendo trabou pa e bario.

Prome Minister Eman a expresa e deseo cu e espacionan habri wordo uza tambe door di fundacion y organisacionnan non-gubernamental di e bario pa yuda fortifica e trabounan di bario, na bienestar di e ciudadanonan. Ya caba por a scucha cu e cantidad di personanan cu ta haci uzo di servicio di Oficina Auxliar (Hulpbestuurskantoor) a aumenta.

E apertura oficial di e edificio aki lo tuma luga denter di algun siman ora cu haya su nomber oficial, e mandatario a splica cu e MFA tabata e nomber di e dossier. Cada un di edificionan aki lo haya nan propio nomber.

AZV su bosero, Solange Tchong, a expresa cu for di awor nan ta mira exito di e servicio den bario di Noord. Mas si mira cu AZV tin 18.000 cliente den e area aki. “E ta algo unico y nos ta contento di por ta den Noord y cu mas hende haci uzo di e servicionan aki.”  Otro compania estableci aki den ta Calloway, kende a wordo representa pa Francisco Mayorga, cu a expresa cu nan ta contento di a haya e chens di brinda nan servicio den un edificio asina importante pa pueblo di Noord. “Nos ta bay yuda haci e edificio aki placentero pa tur esnan cu ta haci uzo di e servicionan aki den,” el a bisa. MedLab, cu ta ubica na di dos pisa di MFA Noord ta cla pa cuminsa brinda su servicio entrante dialuna awo, segun sra. Anny Jansen a splica. Nan ta masha agradecido pa e chens cu nan a haya di por brinda nan servicio for di e edificio strategico aki. Aruba Bank di su banda ta bay ubicar un bancomatico. “Un gran parti di nos cliente ta biba of labora den area di Noord, pa cual pa nos e tabata un oportunidad hopi grandi,”  Noraiza Maduro di Aruba Bank a expresa prome cu e firmamento di contracto di huur a tuma luga.

Expresionnan haci den e articulo aki no necesariamente ta refleha opinion di ArenaPoliti.co