Diabierna partnernan a firma contracto cu Prome Minister Eman 

ORANJESTAD – Diabierna den oranan di merdia Prome Minister Mike Eman, kende a bin cu e iniciativa pa construi edificionan multifunctional MFA, a firma contracto di huur cu varios instancia cu a mira den MFA un forma con hiba e servicio mas cerca di comunidad.

Ta trata aki di Calloway, Aruba Bank, MedLab y AZV. Tin mas partner estableci caba den MFA Noord, manera Servicio di Impuesto di Aruba (SIA) y Oficina Auxiliar di Gobierno.

Edificionan MFA ta un proyecto di Gabinetenan Mike Eman, cu ta den ehecucion, basa riba e vision pa hiba e servicio mas cerca di pueblo y crea espacionan unda cu pueblo por topa cu otro.

Un di e promenan pa expresa su deseo pa establece su mes den MFA Noord tabata e Seguro Medico General. AZV. Noord ta un bario hopi grandi unda cu AZV tin rond di 18.000 cliente y asina por hiba e servicio mas cerca di nan. Esaki tabata un necesidad grandi. “E ta algo unico y nos ta contento di por ta den Noord y cu mas hende haci uzo di e servicionan aki,” vocero di AZV Solange Tchong a bisa.

Segun por a compronde di sra. Tchong, den e filial di AZV na MFA Noord nan ta brinda tur servicio, incluso esun di cambio di zorgpas. Nan ta traha aki segun e orario normal di oficina. No solamente nan clientenan di Noord por haci uzo di nan servicio, pero tambe pa esnan cu ta traha den sector di hotel, cu kisas e oficina aki ta riba nan ruta pa trabou of cas.

Otro compania ta Calloway, cu a wordo representa den firmamento di contracto door di Francisco Mayorga, kende a expresa cu nan ta contento di a haya e chens di brinda nan servicio den un edificio asina importante pa pueblo di Noord. “Nos ta bay yuda haci e edificio aki placentero pa tur esnan cu ta haci uzo di e  servicionan aki den”. Calloway tin e operacion di e cafeteria cu ta net na entrada.

MedLab, cu ta na di dos pisa di MFA Noord ta cla pa cuminsa brinda su servicio entrante dialuna, segun sra. Anny Jansen a splica. Nan ta masha agradecido pa e chens cu nan a haya di por brinda nan servicio for di e edificio strategico aki. Nan ta haci tur test laboratorio y ta opera tambe segun oranan di oficina.

Aruba Bank di su banda ta bay tin un bancomatico. “Un gran parti di nos clientenan ta biba of labora den area di Noord, pa cual pa nos ta un oportunidad hopi grandi di pone un di nos mashinnan aki,”  Noraiza Maduro di Aruba Bank a bisa prome cu firmamento di contracto di huur a tuma luga.

Servicio di Impuesto tambe tin un oficina den MFA Noord mescos cu Oficina Auxiliar di Gobierno. Ademas tin espacionan cu por wordo gehuur door di organisacionnan NGO, social of deportivo pa tene reunion of otro actividad. Prome cu e firmamento a tuma luga, Prome Minister Eman a expresa su satisfaccion grandi cu e MFA ta cla y den operacion completo. “Esaki ta un momento di hopi satisfaccion pa mira cu e vision cu nos a pone nos dilanti na momento cu nos a dicidi di crea e espacionan nobo pa servicio di barionan, poco-poco ta hayando su contenido tambe.”

Expresionnan haci den e articulo aki no necesariamente ta refleha opinion di ArenaPoliti.co