Pa Eman tabata importante keda Aruba relaciona cu perdida di esnan riba lama.  

Nan odisea a caba diadomingo atardi   

ORANJESTAD - Tur cos tabata cla pa Prome Minister Eman hunto cu un delegacion sali rumbo Paris unda COP21, e reunion mas importante di e epoca aki ta tuma lugar unda ta defini agenda 2030 pa loke ta cambio di clima y su efectonan pa islanan SIDS. Prome Minister Eman y su vision berde a hala atencion di mundo henter y di esnan den top di Nacionnan Uni. Esaki ta motibo cu el a wordo invita un biaha mas door di Reino Hulandes pa ta presente como orador den algun discurso, tambe como panelista y pa dirigi algun bilateral durante e siman sumamente importante na e ciudad di luz Paris. Na momento cu Prome Minister Eman a keda informa di e destino di 10 persona perdi riba lama saliendo di Aruba pa Venezuela, e no a pensa dos bes y a cambia su biahe mesora. El a sigui e desaroyonan di buskeda di cerca den convivencia cu e famianan cu tabata bibando un insiguridad penoso mientras nan sernan keri ta den un odisea riba lama. Diadomingo den oranan di atardi a logra haya esnan perdi riba lama. Un alivio grandi a domina e sentimentonan na Aruba.

Delegacion di Aruba na Paris

Mientrastanto parti di e delegacion a yega Paris caba. Minister di infrastructura Sevinger ta reemplazando Premier Eman den e prome reunion cu ya caba a tuma lugar den presencia di Prins di Monacco, President di Carbon War Room Figueres y representantenan di SIDS (Small Island Developing States). Na Paris tin hopi turbulencia andando despues di atakenan terorista dos siman pasa.

Importancia di presencia di Aruba na COP21 na Paris

Siman pasa diabierna Prome Minister Eman a splica pakico presencia di Aruba, aunke un isla chikito, na e reunion aki ta asina esencial. “Presencia di Aruba ta tuma lugar den cuadro di Reino Hulandes cu a invita nos pa ta presente na e top na Paris. Mas y mas Aruba Aruba ta tumando e posicion como isla cu e meta hopi imporante su dilanti pa na 2020 Aruba ta bay haci 100% uzo di energia renobabel. Percura asina cu e sistema ecologico no ta wordo afecta. E meta di Aruba ta pone cu nos ta aplicando tecnologianan cu tanto den produccion di energia como tambe den e forma con mantene e stabilidad riba nos sistema di energia cu ta aplicabel den contexto mas grandi, pa mundo mira con e ta funciona den un contexto mas chikito.” Tur esaki a pone cu partnernan internacional a afilia nan mes na Aruba manera Carbon War Room, TNO y varios otro mas. E tema cambio di clima na Paris ta pa papia riba SIDS di cual Aruba ta parti di dje. Eman a bisa cu Reino Hulandes ta orguyoso cu un di su partnernan den Reino (Aruba), ta liderando e temn aki. “Lidera, pero sigur kier expone tambe e experiencia y ambicionnan di Aruba riba e plataforma internacional na Paris cu tin wowo di mundo henter riba dje. E ta algo positivo no solamente pa nos mes aki na Aruba, pero tambe algo positivo cu Reino ta contribui na dje y cu Reino ta orguyoso di dje.”

Expresionnan haci den e articulo aki no necesariamente ta refleha opinion di ArenaPoliti.co