PARIS/ORANJESTAD - President di Polynesia Frances sr. Édouard Fritch a papia en extenso cu Prome Minister di Aruba Mike Eman na COP21. Despues di e reunion el a comenta cu pa nan di Polynesia Frances e reunion aki ta di gran importancia. “Nos ta den un situacion similar cu Aruba y e otro islanan Caribense Hulandes. Ta p'esey tambe cu nos mester tin un strategia igual door di nos asociacion den Union Europeo. Nos mester tin un bista total kico ta posibel cu nos por haci pa e hendenan den nos paisnan. E reunion cu nos tabatin ta pa acorda esaki ya cu hunto nos mester lucha y logra cosnan pa nos hendenan. Esaki ta e plataforma pa haci’e. ”

Prome Minister Eman a haya e encuentro placentero y a comenta cu Polynesia Frances ta un pais cu influencia. “Parti di nos historia ta igual. Esaki y nos vision comun pa loke antes tabata nos madre patria ta brinda nos hopi oportunidadnan. Di colonia nos a bira paisnan cu hopi potencial y partnernan real cu Union Europeo y cu loke tabata antes nos madre patria cu cual nos tin un historia comparti. E hecho cu nos ta situa geograficamente interesante pa Europa cu fronteranan hopi leu di e continente y condicionnan climatico ta unico pa e experiencia Europeo. Dentro di e retonan cu cambio di clima ta trece cu ne tin tambe hopi necesidad pa estudio di tecnologianan nobo pa por deal cu e desaroyo y retonan den mundo.”

Eman a splica cu Polynesia Frances tin hopi experiencia riba loke ta wordo yama tecnologia SWAC. Esaki ta encera haci uzo di awa den diferente temperatura pa asina provee coriente pa airconditioning y otro aplicacionnan. Un tecnologia cu por wordo uza den un escala chikito, pero una bes cu bo ta domina e tecnologia bo por practik’e den ciudad y paisnan grandi. ‘Aruba ta den un proceso unda e tecnologia aki ta wordo studia y getest pa desaroy’e. Esaki ta un avance grandi pa hopi paisnan na mundo y claro pa nos tambe. P'esey mi kier enfatisa aki cu e balornan adicional cu nos como islanan tin den e contexto mas amplio di Nacionnan Uni, ta na nos bentaha. Trahando hunto cu Polynesia Frances y dos pais grandi cu ta Francia y Hulanda, pero tambe Inglatera y Dinamarca, nos ta logra hopi. E reunion cu Édouard Fritch tabata importante y inicio di nos responsabilidadnan hunto pa yega na resultadonan importante,” Eman a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co