Encuentro di OCTA na 2016 ta tuma luga na Aruba  

ORANJESTAD – Durante un conferencia di prensa teni durante COP21 na Paris unda tabata presente Dolf Gielen di  organisacion IRENA (International Renewable Energy Agency) y Prome Minister Mike Eman, consehero y Vice Presidente di OCTA (Overseas Countries and Territotories Association) a anuncia  afiliacion di OCTA na IRENA. E tema di energía renobabel ta uno masha importante pa e nacionnan chikito ya cu energía renobabel ta ofrece un futuro mas sostenibel pa e islanan.

Dolf Gielen di IRENA a haci e anuncio di un cooperacion hopi mas estrecho entre OCTA (Union Europeo) cu SIDS (Small Islands Developing States) Lighthouse. OCTA ta representa un grupo hopi diversifica, segun Gielen a bisa, consistiendo di islanan di varios area cu via Constitucion ta liga na 4 pais di Union Europeo.

A wordo señala cu islanan OCTA ta situa den climanan diverso, y ta ofrece oportunidad y potencialnan, no solamente pa nan mes, pero cu mirando nan disponibilidad, ta mandando señal fuerte pa e islanan  no wordo mira solamente como victima di cambionan climatico. Nan ta dispuesto pa traha y busca solucionnan. Tambe, segun Gielen, nan ta contribuyendo activamente pa haya solucionnan.

A splica cu SIDS Lighthouse ta un iniciativa lansa durante e cumbre climatico di 2014 y su meta ta pa tin un transicion structura pa solucionnan renobabel pa SIDS. Reaccion riba e iniciativa aki ta cu 13 nacionnan isleño a bira miembro y 19 “development partner” a asocia nan mes.  E idea ta pa mobilisa un inversion di 500 miyon dollar y produci 120 megawatt di energia renobabel por medio di diferente forma. “Crea un roadmap pa un transicion mas suave,” el a bisa.

Prome Minister Eman a expresa di ta sinti “un orguyo grandi pa islanan participa den un programa inspirador manera The Lighthouse.” Pero e mandatario a trece dilanti cu e asociacion aki ta importante tambe “pa islanan cu ta wordo afecta door di cambionan climatico, cu nan beachnan ta wordo afecta pero tambe nan agricultura.”

E mandatario a duna un splicacion di loke Aruba ta haciendo riba e tereno aki, unda cu den forma rapido a cuminsa cambia e pensamento di e pais y dirigi su mes riba un maneho sostenibel riba diferente tereno. Esaki pasobra a constata cu den cierto periodo Aruba a crece enormemente pero e crecemento aki no a bay man-den-man cu bienestar di e ciudadanonan. “E conexion entre crecemento economico y bienestar ta forma parti esencial di e vision sostenibel di Aruba. Nos a cambia nos concepto social economico for di e enfoke riba volumen pa enfoke riba calidad. Den esaki tabata importante pa mira con nos ta produci energia riba nos isla,” Eman a splica.

Na inicio tabata importa 6500 bari di fuel pa dia pa produci energia y a baha esaki awor cu mita. Door cu kier logra un sociedad sostenibel, a traha un agenda ‘berde’ ambicioso pa ta totalmente sostenibel na 2020. Aruba a asocia su mes entre otro cu Carbon War Room y varios otro partnernan y a cuminsa haci cambionan. Awor Aruba ta produciendo 30% di su capacidad di energia di forma sostenibel.

Pa tur e motibonan ariba menciona e mandatario a expresa di ta contento di por traha cu IRENA y a menciona e Centro di Excelencia cu ta keda estableci na Aruba cu ta accesibel pa henter mundo y ta duna informacion riba exito di paisnan riba e tereno di energia renobabel.  “Nos kier pa Aruba ta un “living lab” pa mundo mira con nos por haci esaki hunto. Danki IRENA pa boso apoyo, e fondo y apoyo tecnico cu ta disponibel ta masha importante pa islanan chikito cu tin recursonan limita.”

Na final Eman a informa cu otro aña Aruba ta anfitrion di e encuentro di OCTA. El a expresa di ta hopi entusiasma di por prepara e conferencia pa otro aña.

Expresionnan haci den e articulo aki no necesariamente ta refleha opinion di ArenaPoliti.co