A toca areanan di interes riba tereno di sostenibilidad 

ORANJESTAD/NEW YORK - Durante su estadia na New York y e reunionnan bilateral cu Prome Minister tabatin cu varios pais y SIDS (Small Island Developing States) a bin un punto importante dilanti cu ta e asiento den Conseho di Siguridad di Nacionnan Uni cu Hulanda ta aspira pa haya. Sra. Jocelyne Croes, consehero di Prome Minister di Aruba encarga cu asuntonan diplomatico, kende a forma parti di e delegacion di Prome Minister a bisa cu e reunionnan unda Eman a papia cu minister y otro mandatarionan riba e tema aki a bay hopi bon. Eman a enfatisa  cu si Hulanda logra haya e asiento den Conseho  di Siguridad esaki lo avansa e puntonan di importancia pa islanan chikito mirando cu Reino mes ta consisti di e islanan Caribense. Jocelyne Croes: "Esaki ta pone cu e islanan chikito por mira e bentahanan cu tin si nan vota pa Hulanda haya e asiento aki."

Sra. Croes a splica cu durante nan estadia na New York varios evento a tuma luga. Un cu a wordo hopi bon atende ta esun cu World Resources Institute (WRI). Aki tabatin un panel cu participante di nivel ministerial. "Na e encuentro aki a papia di e metanan di desaroyo sostenibel, pero tambe di e acuerdo di Paris (COP21), unda tin puntonan comun pa traha riba e dos acuerdonan aki y enfocando riba islanan chikito. P.e. ki posibilidad tin di financiamento di proyectonan di energia renobabel. Pero tambe riba diferente aspecto di medio ambiente, aspectonan di proteccion di naturalesa den lama. E debate aki tabata uno hopi bon. Prome Minister a co-host e evento cu a tuma luga den seno di Nacionnan Uni."

Un otro evento bilateral tabata uno di proyectonan unda banconan ta envolvi. "'Green Climate Fund' y Banco Mundial tabata presente. Reino Hulandes y UN office for SIDS y landlocked countries a participa den e panel aki pa trece padilanti ki sorto di proyectonan of ki sorto di modalidadnan tin pa financia diferente proyecto den e area di medio ambiente. Hopi isla chikito ya ta wordo afecta dor di cambio di clima, e nivel di awa cu ta subi y secura cu tin un impacto grandi riba entre otro agricultura. Prome caba cu e acuerdo di clima na Paris, tabata wak ki sorto di financiamento tin pa baha e efectonan di cambio di clima, pero tambe kico haci pa evita un cambio di clima asina acelera manera ta tumando luga actualmente." Prome Minister Eman a sigui pa su biahe di trabou na Washington.

Expresionnan haci den e articulo aki no necesariamente ta refleha opinion di ArenaPoliti.co