Metanan sostenibel global tabata tema di su discurso

ORANJESTAD/NEW YORK - Prome Minister Mike Eman ta na New York pa un biaha di trabou. Durante un evento organisa pa World Resources Institute (WRI) den Westin Resort na New York diaranzon anochi, Prome Minister Eman tabata orador di honor pa un publico interesa pa sa mas di Aruba y su envolvimento den e Metanan pa Desaroyo Sostenibel (SDG), introduci pa Nacionnan Uni aña pasa. E evento aki ta uno cu a conta cu presencia di un cantidad grandi di representantenan internacional importante. E presentacionnan e anochi aki tabata un preambulo pa e debate importante pa su mañan den Nacionnan Uni. Eman a toca varios tema di interes e anochi aki.

Eman: "Durante e ultimo tempo desde cu e metanan sostenibel a keda adopta nos a sinti un ambiente di compromiso cu nunca antes a wordo sinti. Nos a mira paisnan grandi cu a compromete nan mes pa traha pa controla cambio di clima. Nos a mira tambe paisnan cu siendo den conflicto cu otro ta sinta hunto na mesa pa busca un manera con promove calidad di bida pa e ciudadanonan di nan pais y di mundo. Tambe nos a mira paisnan grandi cu nunca antes a compromete nan mes di manera fuerte pa sostenibilidad mundial ta trahando hunto awe pa logra e meta aki. Esaki mescos cu institucionnan mundial cu no tabata sincronisa y cu no tabatin un solo meta comun manera tin awe, ta cera cabez y ta trahando riba e futuro aki. Hasta paisnan chikito riba peticion ta sinta na mesa y participa y duna nan contribucion pa bin cu solucionnan pa e retonan gigantesco cu tin".

Eman a splica cu islanan chikito manera Aruba por trece solucionnan pa e retonan den mundo. Asina Aruba pa medio di un living lab por test cambio di clima y con mundo mester deal cu esaki. Islanan ta e lugarnan adecua pa test con ta para cu nos lamanan, con produci awa potabel, con evita erosion. "Aruba, como isla cu ta forma parti di Reino Hulandes, ta anfitrion di e reunion aki y esey ta haci mi orguyoso. Orguyoso pa trece dilanti e compromisonan di Hulanda pa treci dilanti tur tecnologia, conocimento y historia cu Hulanda tin den e capacidad aki."

Siguiendo su discurso Eman a conta cu Hulanda ta un pais cu ta pa gran parti bou nivel di lama. Na 1953 e dijknan a kibra y a pais tabata den un estado alarmante ora e awa a drenta tur caminda y hopi morto a cay. Reina Juliana a tempo ey a haci e compromiso cu Hulanda lo percura pa esaki nunca mas sosode y lo yuda tur otro pais na mundo cu por haya nan mes den un situacion igual pa siña nan con combati e awa. Awe Hulanda ta conoci den tur skina di mundo pa su conocimento y tecnologia riba tereno di awa. Tambe Eman a papia riba e situacion na Haiti na 2010 ora un teremoto a sacudi e pais cu ya caba tabata den un situacion di hopi reto. Aruba a saca un man yuda, mescos cu hopi otro pais. Paisnan awendia, guia pa Nacionnan Uni, ta haciendo compromisonan pa yuda nan rumannan chikito den necesidad. Paisnan unda cambio di clima ta causa desasternan di naturaleza.

WRI ta un instituto di renombre internacional estableci na Washington DC, cu cedenan regional na Sao Paulo Brazil, Beijing China, Den Haag Hulanda, Mumbai India y Jakarta Indonesia. E instituto ta un  oraganisacion global y no-gubernamental cu un staf global di mas di 450 scientifico, economista, experto den maneho, analista y comunicadornan cu ta traha pa desaroya y promove manehonan cu e intencion pa proteha mundo su medio ambiente y mehora bida di su poblacion.

Expresionnan haci den e articulo aki no necesariamente ta refleha opinion di ArenaPoliti.co