Minister Otmar Oduber ta mustra e necesidad di construccion di facilidadnan riba beach 

Un di e motibonan principal cu e turista ta scoge pa bishita nos ta pa e por disfruta di nos recurso natural cu ta nos beachnan. No ta un secreto cu e demanda ta halto specialmente den e area hotelero. E area congestiona aki ta sinti un presion enorme na momento cu e  cantidad grandi di turistanan di e barconan crucero tambe kier disfruta di e beachnan. Minister Oduber ta indica cu tin un plan grandi pa locual ta nos beachnan. E motibo principal cu tur e turistanan ta concentra den un area specifico ta pa e cantidad di facilidadnan manera por ehempel baño, pa nan por dal un douche, di por come algo of bebe algo. Manera ta conoci maneho di Beach Policy dentro pa prome di juli ta drenta na vigor y parti di dje ta encera tambe pa crea diferente area unda e tour busnan lo por hiba nos bishitantenan di e barconan crucero na e otro opcionnan cu no ta crea e congestiona manera a bin ta tuma luga. E mandatario ta menciona dos proyecto completa cu el a ricibi hopi elogio p'e ta e facilidad na Arashi como tambe esun na Surfside of popularmente yama Nikki Beach. Ambos facilidad construi riba e beach pero a carga sosten masal mirando cu nan ta bon prepara y percura cu nan ta di un bon calidad. Minister ta lamenta cu awor specialmente e fraccion di oposicion ta purba haci politica cu un proyecto asina positivo. Minister Oduber ta splica cu a scoge pa construi e facilidadnan di beton pa percura cu nos como Producto Aruba keda riba e nivel di "Blue Flag", papiando di mantencion y di e calidad di beachnan. E mandatario ta sigui splica cu na final ta Gobierno ta esun cu lo mester percura pa mantencion di e facilidadnan aki y pa e motibo aki mes a scoge pa un material cu lo por contra di salpeter entre otro. Por nota uniformidad entre tur e kiosconan tanto na Nikki Beach, Arashi y awor e 2 nan na Eagle Beach cu ta forma e prome 4 nan, pa brinda nos bishitantenan pero tambe localnan mas opcion. A envolvi tur e departamentonan concerni pa percura cu ta scoge e miho localidad pa e kiosconan y miho material pa asina percura pa mas opcion y tambe siguridad  pa tur e usuarionan di nos beachnan. Proyectonan cu ta carga sosten financiero di tanto TPEF como tambe ATA, cu ta paga pa e solucion cu kier crea pa nos beachnan.  

Minister Oduber a scoge pa topa cu prensa na e kiosco banda di hotel Costa Linda riba Eagle Beach pa mustra e hecho cu e facilidad aki ta keda construi riba e area unda ta para auto of durante campamento sa haci uzo di e espacio aki, y na ningun momento ta construyendo riba e santo blanco di lama. E mandatario ta mustra cu no ta trata di ningun destruccion di nos beachnan, alcontrario por mira mescos cu e otro kiosconan na momento cu termina e proyecto aki lo eleva e calidad di e beach unda nan ta situa.

Pa locual ta e ubicacion di e kiosconan por menciona cu esaki ta cuadra cu e plan infrastructural di e area. Minister Oduber a indica cu a construi e kiosco teniendo na cuenta cu lo construi  Watty Vos Boulevard cual lo termina net pariba di e kiosco. Pues henter e area manera nos conoce awe lo cambia completamente. Sr. ta sigui splica cu e area concidera como "amenity area" cu ta e "stroke" unda awor ta pasa cu auto riba dje, lo keda desaroya den un futuro cercano. Cambionan infrastructural, inversionnan grandi ta continua pa sigui eleva Producto Aruba. Cu e kiosconan aki nos bishitantenan pero tambe nos propio localnan tin hopi mas opcion pa disfruta di nos beachnan.

Expresionnan haci den e articulo aki no necesariamente ta refleha opinion di ArenaPoliti.co