Aruba poco poco ta hundiendo y ta parce cu Mike Eman no a siña su les despues di su KB. Presupuesto 2016 a drenta Parlamento di Aruba y pronto promer cu fin di luna esaki lo wordo trata. Aunke pueblo ta compronde masha bon con e show aki ta bay,13 parlamentario ya caba ta cla pa grita “voor” comprometiendo nos futuro generacionnan inmensamente cu debenan astronomico. Locual ta resalta actualmente na Aruba ta cu criminalidad ta out of control. No ta pasa un dia sin un atraco, un robo di auto of un asalto pa nombra un paar. Segun Dowers y Mike Eman ta high season. Tin biaha ta percepcion di pueblo y ora no por sconde pa realidad ta high season. Pues criminalidad awor a wordo reparti den season den e plan y maneho di Dowers y Mike. Tristo pa tuma nota cu na aña 2013 gobierno a inverti 150 miyon florin den Husticia pero na aña 2016 den presupuesto gobierno a aloca 134 miyon pa cartera di Husticia. Pues a corta 16 miyon den comparacion cu 2013 hustamente den Husticia. Esaki ta un crimen contra e pueblo aki cu ta sangrando cu criminalidad y insiguridad. Pero den mesun rosea gastonan di propaganda pa propaganda ministernan door di companianan di amigo a subi di 2 miyon den 2015 pa 3 miyon den 2016, pues cu 1 miyon florin. Gastonan di amigonan abogado a subi di 13 miyon den 2015 pa 15 miyon den 2016, pues cu otro 2 miyon. Te hasta e post di biahamento a bolbe conoce un aumento di 25% den 2016. Fiesta no ta caba y deroche di placa mester continua. Tur esaki tin preferencia riba siguridad di nos pais. Dowers y Mike a kita e radarnan , a elimina Warda nos Costa, a elimina Helicopter y a haci cambionan adhoc sin un plan y sin ningun vision y awe e resultado ta bisto unda pueblo di Aruba tin di paga pa esaki como victima te den nan weso. Dowers ni Mike Eman no ta digno mas di confiansa pa e crimen cu nan ta cometiendo contra Aruba. Pase loke pase la fiesta continua!  

Expresionnan haci den e articulo aki no necesariamente ta refleha opinion di ArenaPoliti.co