Durante e rueda di prensa di Partido Democracia Real Andin Bikker a mustra satisfecho cu e sosten unanime cu su proposicionnan presenta na Sint Maarten, durante IPKO a haya. 

Fraccion di PDR a presenta un total di 4 proposicion concreto hayando sosten  den e dos encuentronan na IPKO.

Esun prome ta e Fast Ferry cu a ser treci dilanti door di e representacion di PDR den Parlamento hunto cu e Parlamentonan di Curacao, Sint Maarten y Hulanda. T’asina cu tin basta tempo caba dunando atencion na e deseo di e pueblonan pa bin cu conexion di Ferry interinsular, Bikker a bisa.

Un di e fasenan di e proyecto aki ta e conexion entre Aruba, Curacao y Bonaire cu den dos ora so por ta na Curacao y den menos tempo ainda por ta na Bonaire cu un servicio di dos biaha pa dia.

Segun Andin Bikker e fast ferry ta bay fungi manera un brug nautico cu lo crece e economia di cada isla, lo engrandece e lazonan di amistad entre nos pueblonan, y lo crea dimensionnan nobo pa crece e mercado y e economia pa e tres islanan.

Pa Sint Maarten e proposicion ta  pa amplia e servicio aki cu un conexion entre Sint Maarten, Saba, Sint Eustatius yega te Saint Kitts, Saint Evis, Anguila y bay Sint Maarten back

Bikker a splica cu PDR a lidera e empuhe aki, y t’asina cu nan a bishita e Isla di Saba caminda a reuni cu representantenan di Sint Eustatius, Bonaire y Saba, y a splica nan y evalua e infrastructura pa cu esaki.

Andin Bikkeer ta sumamente contento cu e Parlamentonan di Reino unanimamente a bay di acuerdo cu PDR su proposicion y cu a wordo poni den e afsprakenlijst pa duna un empuhe na e proyecto aki pa establece un conexion di Fast Ferry entre e islanan.

PDR tambe a haya apoyo pa otro proposicion mirando cu nan ta haya hopi persona cu ta boga pa haci posible baha cierto gastonan di cu tin di haber cu biahamento pa Reino Hulandes, y e fraccionnan di Curacao y Sint Maarten a bay di acuerdo cu esaki, ademas den e cuadro di Reino Hulandes den su totalidad hopi hende ta biaha pa Hulanda y PDR a haya apoyo unanime den e proposicion aki.

Un di tres proposicion concreto ta pa amplia e dimension di proteccion para loke ta trata e casonan di belasting. Esaki segun Bikker tin un dimension nobo cu aworaki a wordo proponi den Tweede Kamer, y PDR a presenta un amienda of concepto cu a haya elogio y cu e delegacion di Hulanda a complementa PDR, mirando cu semper e ta bin cu cosnan concreto, constructivo y positivo durante e encuentronan di IPKO.

Pa ultimo, PDR a presenta un proposicion pa nos hendenan cu ta ser diagnostica cu cancer, vooral terminal, haya acceso mas rapido posible na remedinan experimental prometedor, cu ta den estudio p.e na Merca y Hulanda.

Bikker a tuma nota di un articulo den un matutino cu ta confirma cu mas cu 60 porciento di hende cu ta muri riba nos isla ta muri di cancer.

El a trece esaki dilanti varios biaha y Hulanda a bishita algun biaha e compania My tomorrow’s.com. “Un compania cu ta dunando acceso na medicinanan cu ta den proceso di desaroyo, na pacientnan diagnostica cu malesanan terminal y cual remedinan ta hopi prometedor” Bikker a bisa.

Tambe a comenta cu na October den e Estado di Florida na Merca a adopta e ley ‘Early access to trial  medicine’, pa e pacientnan haya acceso na medicinanan aworaki.

PDR ta haya necesario pa adapta nos leynan of e maneho, pa nos mes pacientnan pacientnan por haya acceso na e remedinan aki.

Diesun Estado Merca a adopta nan y na October 2015 tabata Florida cu por cierto ta hopi cerca di nos y nos ta bishita Miami masha.

Bikker no a laga afo e compania na Hulanda cu tambe ta duna acceso na e mesun frecuencia, y durante e encuentro na Sint Maarten PDR a pidi Parlamento di Hulanda pa den e siguiente encuentro di IPKO na fin di Mei por haya un werkbezoek pa e persona concerni bin informa nos con nan a reglamenta e sistema.

El a bisa cu cancer ta keda cancer na cualkier parti di mundo, pero lamentablemente nos indice di cancer na Aruba ta alarmante y e ta haya cu a bira tempo pa nos mira e desaroyonan mundial, studia y evalua con por duna acceso na pacientnan cu tin indicacion of un conclusion medico di cancer, kizas terminal, na e medicinanan experimental y prometedor aki.

Expresionnan haci den e articulo aki no necesariamente ta refleha opinion di ArenaPoliti.co