ORANJESTAD – E traslado di operacion di carga pa waf nobo di carga na Barcadera ta representa un logro clave den e progreso di nos pais, no solamente na nivel di infrastructura, pero principalmente den e aspecto economico. Como un isla cu ta importa practicamente 100% di loke ta consumi, e acceso maritimo y aereo ta vital pa sigura desaroyo di nos economia. Mayor capacidad y miho operacion ta traduci den mas eficiencia y tambe mas entrada pa tur esnan inclui den e cadena economico; for di importador te na consumidor. 

Minister Ing. de Meza ta masha orguyoso di forma parti di e Gobierno cu tabatin e curashi pa finalmente tuma e stap y concretisa loke hopi otro a djis papia di dje. Actualmente tin un vierbaansweg cu ta den construccion, 'Green Corridor', por mira un hospital cu ta den pleno renobacion y expansion, mientras cu scol y barionan tambe ta haya nan atencion. “Gabinete Mike Eman I y II a ehecuta e proyectonan necesario y sumamente importante pa Aruba, pa hiba Aruba na e siguiente nivel pa cu nos economia,” e Minister a declara.

“Nos ta sumamente orguyoso y contento di wak cuanto movecion tin aki riba; y e ta bay bira hopi mas tambe,” e titular di asuntonan economico como tambe encarga cu Aruba Ports Authority, a expresa despues di su recorido di e waf di carga nobo. E puerto maritimo y e puerto aereo cu ta nos aeropuerto internacional Reina Beatrix, ubica un poco mas pabou, ta e curason di Aruba su economia. “Esaki ta sotene tur loke ta pasa na Aruba.”

“E waf na Playa ta bira e terminal di crucero cu ta bay carga adicionalmente e industria di turismo. Esaki ta un parti sumamente importante di Aruba su economia,” Minister de Meza a menciona. APA ta trahando caba riba plan di desaroyo pa e waf di Oranjestad. Deseo di Gobierno ta pa esaki wordo desaroya y haci mas atractivo, no solamente pa nos bishitantenan, pero tambe pa e propio pueblo Arubiano.

Minister Ing. Mike de Meza a menciona cu pa fin di luna di maart APA NV. cu ASTEC ta bay ofrece un ‘open dag’ pa tur instancianan envolvi pa asina bin admira e proyecto completamente finalisa. For di dialuna ultimo e prome barco di container a mara na Barcadera.

Expresionnan haci den e articulo aki no necesariamente ta refleha opinion di ArenaPoliti.co