Vision di Gabinete Mike Eman pa mehoracion di barionan rond di Aruba concretisando mas y mas. 

ORANJESTAD – Diaranson atardi otro mini cancha di futbol a keda inaugura den un bario riba nos isla. Despues di a habri un na Bushiri algun luna atras, awo ta Madiki ta bay goza di un facilidad pa grandi y chikito. Minister President Mike Eman, den compania di Minister di Infrastructura Benny Sevinger, Minister di Deporte Alex Schwengle y Minister di Husticia, Arthur Dower, hunto cu funcionarionan di FCCA, director Peter Van Poppel, Jose Paula y tambe representante di Vasquez contractors, a declara oficialmente habri e parke deportivo y di recreacion. Un cantidad grandi di bisiña y personanan relaciona cu e proyecto tabata presente pa asina mira momento cu e cancha ta wordo dedica na memoria y bida di Sr. Ovi Orman como gran promotor di futbol na Aruba, pero particularmente den bario di Madiki y becindario. 

“Pa nos e ta importante cu tin e luganan di recreacion aki pa nos hobennan, sigur ora bo mira con e cancha aki ta desaroya cu e hobennan por hunga y e hendenan grandi por ta cerca,” asina Prome Minister Eman a bisa durante e ceremonia di apertura. Na su opinion, “e ta trece e comunidad hunto y e ta trece e control cu nos ta desea pa e barionan.”

Loke inicialmente tabata planea pa ta solamente un mini cancha di futbol, a crece bira un parke recreacional danki na e aporte di tur esnan envolvi, for di Gabinete Mike Eman y FCCA te na e contratista constructor y e propio Fa Orman, yiu di Ovi. Fuera di e cancha deportivo, e facilidad ta conta tambe cu wega pa muchanan chikito, pero tambe facilidad pa haci ehercicio. A inclui bankinan pa mayornan por wak nan yiunan hunga y grandinan por sinta combersa.

“Sigur algo di aprecia. Nos tin un prome minister cu tin un vision y un ekipo completo pa tur reto cu por presenta pa nos isla,” asina Fa Orman a expresa gradiciendo Gobierno pa e regalo na e bario y pa e dedicatorio na su tata. “Esaki ta un proyecto cu ta wordo haci cu dedicacion.”

Minister Benny Sevinger a felicita Prome Minister pa su dedicacion na e proyecto y ta contento di tende cu tin mas di e tipo di facilidadnan aki na caminda pa otro barionan di Aruba, fuera di su Madiki stima. “Poco poco a habri Bushiri, awo Madiki y despues Cura Cabai, pero Bubali y Dakota tambe a pidi kier men e trabou tambe ta sigui,” asina e mandatario a indica.

Minister Alex Schwengle tambe a hiba palabra felicitando e bario di madiki y gradiciendo Prome Minister pa e sosten cu ta duna su Ministerio den e promocion di e veldnan deportivo y movecion. E proyecto aki ta un muestra cu Gabinete Mike Eman ta un ekipo uni cu ta sostene e mesun bon boluntad pa nos pueblo.

Expresionnan haci den e articulo aki no necesariamente ta refleha opinion di ArenaPoliti.co