ORANJESTAD- Durante su disertacion den Parlamento di Aruba, Prome Minister Mike Eman a duna un tremendo splicacion con escogencianan di pasado te dia di awe tin nan consecuencia y efecto riba economia di varios pais den mundo. Escogencianan cu a crea un desempleo structural den paisnan bisiña, cu te ainda ta lucha pa sali for di dje. “Nos no tabata kier esey pa Aruba”, Eman a bisa.

Den oranan di marduga Eman a splica cu momentonan di crisis financiero den un pais, tin intelectualnan cu ta boga pa austerisa. Pa corta den gastonan, tuma medida y busca asina forma pa completa locual e pais a perde. “Pero, banda di e intelectualnan aki tin mes tanto otro cu ta bisa cu ora tin un crisis asina, cu gobierno a perde entrada y economia a cay, no ta e momento pa tuma medida of austerisa. E intelectualnan aki ta bisa cu ta hustamente e momento pa gobierno stimula actividadnan economico y sostene poder di compra di esnan cu a perde entrada, cu ta riba un bijstand of ta depende di ayudo pasobra doño di trabou no por duna un salario mas halto.

“Enfrenta cu e situacion cu nos a bin haya na 2009 na unda tabatin un caida di economia di Aruba di 15%, 12% di desempleo, un empobrecimento total y un deterioro fisico di scolnan, bario y centronan di ciudad, e gobierno nobo a haya su mes cu e mesun retonan cu paisnan mediano y grandi a haya nan dilanti. Kico ta e paso cu mester tuma den un situacion asina. Kico ta e contesta corecto pa e retonan ey”? Partidonan di oposicion tin un solo contesta pa loke ta e pregunta aki. Cu debe di pais Aruba a redobla. Cu cifranan den man Eman a ilustra con tur pais serio na mundo, entre nan Hulanda y Merca, a mira un redoblacion di nan debenan. Asina e debe di Hulanda cu tabata 41% a yega 79%, Merca cu tabata na 58% a yega na 102%. E promedio di Union Europeo cu tabata na 38,7%  a bira 87,1%. “Tur esaki den e mesun periodo di tempo cu Aruba”. Eman ta haya cu aki no por tin comparacion cu otro Gabinetenan “Esaki tabata den un completamente otro periodo, enfrente un crisis financiero mundial. “Loke Aruba a perde ta 200 miyon florin na entrada. Nos por a scoge pa e receta di medida. Riba e dolor di perdida di poder di compra, di desempleo, di caida di economia, suta e pueblo cu medida.”

Eman a splica cu na Aruba e situacion tabata pio cu e crisis mundial so. Esaki pasobra banda di e crisis aki, Aruba riba dje a perde e refineria den e mesun aña. “The perfect storm”, Eman a califica e situacion. Frente e reto aki Aruba tabatin dos receta. Dos grupo di hende cu mes hopi argumento ta bisa ‘of ta esun of ta e otro’. Den caso di Aruba e escogencia tabata basta cla. Un pais manera Hulanda cu derepente ta mira su economia a cay por scoge pa austerisa. Pero un pais manera Aruba, na unda e pueblo den e añanan prome cu cosnan mester tabata miho, a perde 25% di su poder di compra, no a inverti den centro di ciudad ni tampoco den infrastructura. Esaki ta pone cu e escogencia tabata hopi cla pa evita un debacle pa pais Aruba. Pa evita cu desempleo conjuctural bira structural. “Esaki ta causa un circulo vicioso di cosnan negativo di cual bo no ta sali di den 1, 3, 5, 10 of 20 aña. Tin hopi pais cu a haci escogencianan robes y nan desempleo y nan economia den recesion conjunctural a bira structural”.

“Nos a dicidi cu e perdida di 200 miyon pa aña no ta bay wordo recupera na e momento critico den desaroyo di nos pais. Cu 15% di caida di economia y cu 12% di desempleo nos no ta bay tuma medida riba dje. Keda sin haci inversionnan pa duna Aruba un apariencia atrobe, un pais di calidad atrobe pa asina e comunidad sinti su mes inspira pa kere den su pais, tampoco tabata e contesta”.  E gobierno a haci e inversionnan necesario cu tabata cuantioso y cu orguyo Eman a anuncia cu Deputy Secretary of State, e autoridad mas halto Mericano, kende a bishita Aruba a bisa ‘Esaki ta un pais cu vision. Un pais cu a inverti na momento cu mester a inverti. Un pais cu a pone un liña pa futuro cu sa unda e ta bay’. Aruba a haci e bon escogencianan. Historia lo demostra esey.

Expresionnan haci den e articulo aki no necesariamente ta refleha opinion di ArenaPoliti.co