Henter e aña 2014 a wordo caracterisa pa un aña di discucionnan dificil cu gobierno Hulandes riba e maneho financiero-economico di gobierno di AVP. E discucionnan a trece tension den e relacionnan cu por lo demas ta bon. Asina fuentenan na Hulanda mes ta bisa tambe. Un di e puntonan di discucion entre gobierno di Aruba y di Hulanda ta e forma cu ta reduci e costonan di gobierno pa trece e entrada y gastonan di gobierno mas den balansa. Ora logra esaki lo por cuminsa paga directamente riba e debenan di nos pais cu a acumula den e ultimo 28 aña bou di tur gobierno cu Aruba tabata tin. E discucion con pa trece balansa den e presupuesto di gobierno a conduci na e exigencia di banda di Hulanda pa corta gastonan mas lihe y pa accepta e Comision di control Financiero (CFT) di Corsow y Sint Maarten. Gobierno di Aruba a tuma tur e recomendacionnan di e CFT cu Hulanda a impone y a pone nan den e presupuestonan di 2014 pa 2018. Anteriormente Hulanda tabata kier pa Aruba yega un presupuesto balansa den un aña. Algo cu bou precion di Union Europeo ni Hulanda a logra haci. Na caminda Hulanda a realisa cu esey ta algo imposibel.


CFT

Pa loke ta e Comision pa Control Financiero, gobierno di Aruba a scohe pa traha su propio organo di control financiero cu lo funciona mes independiente cu Raad van Advies y cu lo inclui den su desicionnan e conseho di expertonan di Hulanda den e CFT. Di e forma aki tur dos punto di discucion - e forma pa yega na presupuesto balansa y e organo independiente di control financiero- a wordo hinca den e maneho di gobierno di Aruba. E presupuesto supletorio di 2014 ta un di e presupuestonan cu parlamento ta haya pa aproba e maneho cu ta inclui e exigencianan di Hulanda.


OPOSICION

Oposicion di MEP y PDR henter aña a exigi pa gobierno corta gasto y cumpli cu tur loke Hulanda ta exigi. MEP y PDR tabata contento ora e raport di CFT a sali y a exigi pa gobierno di Aruba cumpli completamente cu e raport di CFT. MEP y PDR a bisa cu nan si kier un bon relacion cu Hulanda y a sostene e exigencianan di Hulanda como muestra di esaki. Ta tristo pa wak awor cu MEp y PDR ta vota contra di e presupuesto cu tin e exigencianan di Hulanda den forma di e recomendacionnan di CFT aden. Vota contra ta nifica cu bo no ta di acuerdo. Den caso di e presupuesto supletorio e ta nifica cu MEP y PDR no ta di acuerdo cu gobierno di Aruba ta ehecuta e recomendacionnan di Hulanda y CFT. Algo cu MEP y PDR a exigi continuamente.

Ta atrobe tristo pa wak con e dos partidonan aki ta bolbe bisa un cos y haci otro. Ta bisa cu nan kier bon relacion cu Hulanda y awor ta vota contra di e presupuesto manera Hulanda ta kier. Ta dificil pa sa kico bo tin na e dos partidonan MEP y PDR awor aki. Obviamente nan a perde e caminda y no ta scucha e voz di  pueblo ni di Hulanda. Nan ta perdi y no sa den ki direccion nan mester bay. Y ainda nan ta pretende di kier duna Aruba direccion pa futuro.

Expresionnan haci den e articulo aki no necesariamente ta refleha opinion di ArenaPoliti.co