Gerick Croes (MEP): Maneho di libertinahe hiba door di Minister di Labor causando daño social na nos comunidad!
Loke ta pasando cu e hobennan di nos pais cu actualmente ta busca trabou ta algo cu no por tolera. Claramente tin varios obstaculo crea pa ministernan sr. Paul Croes y sr. Benny Sevinger, nan departamentonan y varios empresanan cual conhuntamente a percura pa pega full e proceso pa yega na un trabou.
Desempleo creando bom social
Segun datonan compila di DPL y departamento sociaal tin aproximadamente 5000 persona cu no por haya trabao. E parti mas tristo ta e hecho cu den e grupo aki tin hobennan bou di 34 aña cu ta bini di famia humilde cu hopi gana di traha y lamentablemente no ta haya e oportunidad brinda. Esaki automaticamente ta demotiva y ta crea un desgusto. Anto ainda kier pretende di tin hobennan y nos localnan na pecho , esta un hipocrecia! E situacion aki ta hopi alarmante y ta creando un ambiente di odio cual obviamente no ta bon pa e trankilidad y paz di nos comunidad.
Realidad amargo cu gobierno no por core of sconde di dje ta cu hopi hende ta desemplea, gobierno no ta creando cuponan di trabou nobo, ta keda depende riba un solo pilar economico y costo di bida ta birando inpagabel! Hechonan ta indica cu nos pais ta den un crisis social hopi hende no por paga nan recibo di awa y coriente tampoco ta resta pa hasi compras. E consecuencianan ta cu criminalidad pisa ta keda lanta cabes y mas hende ta bibando den pobresa y hasta den hamber diariamente. Kiermeen si sigui kita oportunidad di localnan pa haya un trabou pa brinda bienestar pa nan famia e situacion lo sigui empeora.
Pesei e forma di traha na Departamento di labor, DPL y Dimas ta incomprendibel y cuestionabel den tur aspecto. E hecho cu 90% di e peticionnan ta drenta via un tramitador y casi tur di nan ta wordo aproba door di sea Minister di Labor sr. Paul Croes of Minister Sevinger. Esaki ta nifica cu tur peticion pa importa trahador pa yena vacaturanan local ta wordo aproba per direct. Casi bo por bisa ta basha firma wowo sera. Bo por conclui cu tur e desicionnan di e ministernan aki ta desicionnan anti-local, anti-oportunidad , inhumano, inhusto , pro negoshi di permiso y causa daño social na nos comunidad. Pesei nos di MEP enfaticamente ta condena e maneho di libertinahe hiba door di Minister di Labor sr. Paul Croes cu ta causando daño social grandi na nos comunidad.
Expresionnan haci den e articulo aki no necesariamente ta refleha opinion di ArenaPoliti.co