REACCION RIBA VEREDICTO CONTRA LIDER DI MFK NA CURACAO 

ORANJESTAD – Lider di MEP a wordo puntra pa prensa pa su reaccion riba e veredicto cu a cai na Curacao diabierna mainta tocante lider politico Gerrit Schotte. “Riba bo pregunta di e reaccion di partido MEP riba e veredicto cu a cai na Curacao , mi mester bisa cu e cargonan ta hopi serio, y a yega na condenanan relativamente pisa conosi den Reino. Mi prome reaccion tabata WHAW, aya si tin un Ministerio Publico cu tin curashi, un Ministerio Publico cu ta atende cu casonan di corupcion, y mare cu ta na Aruba nos tabata tin un Ministerio Publico asina. Pasobra ora bo lesa e veredicto bo por mira cu cada un di e acusacionnan cu tin contra Gerrit Schotte na Curacao, ta pasa aki na Aruba tambe, bou nanishi di tur hende, incluyendo Ministerio Publico. Ta cosnan cu nos a manda pa Ministerio Publico caba, cu prueba, pero no kier investiga.
Y ohala cu e veredicto aki, cu biento por trese poco curashi di Curacao pa e ministerio publico na Aruba, pa ministerio publico na Aruba haya curashi y cuminsa investiga casonan di corupcion den gobernacion akinan tambe. Pasobra no por ta asina cu nos ta bai di un caso di corupcion pa otro, un escandalo pa otro, y nada ta wordo hasi.

NEGOSHI DI TERENO DI PARLAMENTARIO MELVIN TROMP MESTER WORDO INVESTIGA
E ultimo escandalo ta e publicacion awe di e prueba cu parlamentario Melvin Tromp di AVP a ganja henter pueblo di Aruba cu e no tin dos tereno, y prueba cu parlamentario Tromp di AVP hunto cu minister Benny Sievinger di AVP ta specula cu terenonan di pueblo. Y esaki ta algo cu NO ta permiti na Aruba.
Ora bo haya un tereno den erfpacht ley ta bisa cu e ta pa ABO traha un cas pa ABO biba aden. Si bo pidi expansion di e tereno ta pa ABO traha bo cas riba dje. Y si bo pidi pa cambio di destinacion, ley ta bisa cu ta pa ABO bai use pa negoshi, pero NO pa abo bende propiedad di pueblo cu un compania di real estate pa miles y miles di florin. Esey ta e acto castigabel cu a wordo cometi.
Nos ta preparando tur documento pa entrega na Ministerio Publico un biaha mas cu tur prueba den man, pasobra Ministerio Publico no por keda wak otro banda. Melvin Tromp y Benny Sievinger a comete actonan castigable, actonan cu ta pone cu nan no por keda den e funcion ni di parlamentario ni di minister. Nos a pidi un reunion publico den parlamento desde januari caba pa minister Sievinger bin duna cuenta riba e negoshi di tereno y su “dezerzijds accoord”. Awor nos ta bai pidi e presidente di parlamento pa accelera e reunion, mirando cu awor ta mas urgente, pasobra Melvin Tromp ta atacha e integridad di henter Parlamento. Ohala Ministerio Publico haya un tiki curashi cu e veredicto aki na Curacao, y si no ta asina mes, mi mester bai tuma bon nota di e nomber di e Officier van Justitie pa asina cu MEP ta den gobierno bek, nos manda buske pa investiga tur e parlamentarionan y ministernan corupto di AVP.

Expresionnan haci den e articulo aki no necesariamente ta refleha opinion di ArenaPoliti.co