EVELYN WEVER-CROES DEN REUNION CU SINDICATO Y TRAHADORNAN DI SABA 

ORANJESTAD –Parlamento a reuni diabierna ultimo cu sindicato y empleadonan di SABA. Un reunion sumamente informativo cu a confirma e preocupacion grandi di henter Parlamento pa cu cuido di nos grandinan. “Mi no por divulga detayenan di e reunion riba peticion di presidente di e comision sra Mervin Wyatt-Ras, pero mi por bisa si cu mi a keda hopi mas preocupa y desgusta con malo e cuido di nos grandinan ta. E ta mucho mas malo cu mi mes a pensa, y esey ta causami un dolor grandi. E trahadornan ta traha cu alma y cuerpo pa nos grandinan, pero e disputa cu tin entre e Minister Schwengle y e directiva di SABA y e hecho cu gobierno no ta pagando subsidio manera mester ta, ta afecta e cuido di nos grandinan. Ni cuanto ley Parlamento pasa lo no yuda tanten cu e disputa aki ta existi.

Mi a scucha minister Schwengle bisa na varios ocasion cu su mannan ta mara, pero esey no ta berdad. Durante e reunion mi a splica cu e ley cu ta regarda subsidionan “subsidie verordening” actualmente caba ta duna e Minister TUR tools pa e controla y maneha cuido di nos grandinan den lineanan general. Manera ya ta custumber, nos di MEP no ta critica so, nos a busca e solucion, y nos a entrega esaki na e sindicato pa e yuda e minister pa soluciona e conflicto. Segun e ley di subsidio gobierno por exigi tur informacion, hasta por exigi di mira e bukinan di e fundacion SABA ki momento cu e ta desea. Unico cos cu e mester hasi ta apunta ambtenaarnan atraves di un landsbesluit. Pami ta keda un interogatorio dicon e minister no kier hasi uso di e ley cu ta regarda subsisio, pasobra e ley aki ta duna e minister suficiente tools. Unico cos cu mi por pensa ta cu e minister kier mas cu locual ley ta permiti’e, y pesey ta den conflicto cu e directiva. Mirando cu e parlamentarionan di AVP  tampoco tabata conose e ley aki, mi a percura pa nan cada un haya un copia.
Cu esaki e minister ta haya E solucion pa e disputa. Awor e bala ta den scochi di e minister pa mira si realmente e kier soluciona e disputa cu SABA, of si e ta scohe pa sigi cu e conflicto. Hecho ta cu gobierno ta atrasa den pago di subsidio na SABA y esey ta afecta e calidad di cuido mesora. Hecho ta tambe cu e cuido di nos grandinan ta seriamente neglisha, y esey ta algo cu ami no ta acepta. Pesey mi ta exigi di minister Schwengle cu e carga su responsabilidad. Ami no ta interesa ken e kier culpa, ni cu ken e kier pleita atrobe. Ami kier djis pa e hasi uso di ley, y cumpli cu su deber pa cu cuido di nos grandinan.

MEP A PIDI REUNION PUBLICO
MEP a pidi un reunion urgente den parlamento cu e minister, cu no a wordo yama ainda. Ta di spera cu e reunion aki wordo yama pronto, pa Parlamento mustra e minister con importante cuido di nos grandinan ta.

Expresionnan haci den e articulo aki no necesariamente ta refleha opinion di ArenaPoliti.co