A pone ex-Big Leaguer Eugene Kingsale na disposicion di e organisacion. 

ORANJESTAD - Gabinete Mike Eman ta sali di e pensamento cu pa medio di deporte ta crea hobennan sano y ta brinda organisacionnan e instrumentonan necesario, ta crea mas espacio pa hobennan por practica deporte. Esaki combina cu e pensamento pa trece comunidad hunto y promove e practica di comunitarismo, ta e motibonan cu Prome Minister Mike Eman a saca un man pa yuda e organizacion Grasshopper Baseball Organization di Ayo. Un organisacion deportivo cu awendia ta conta cu mas di 100 miembro cu ta practica baseball. 

Mas cu 5 aña pasa Prome Minister Eman a wordo informa riba e dificultadnan cu e organisacion deportivo aki ta pasando aden, pa motibo di e deterioro di nan veld y demas infrastructura na Centro di Bario Ayo. E mandatario a mobilisa su team pa mira con por yuda e organisacion, principalmente cu material. E resultado tabata grandi y hasta a dedica un torneo internacional na 2013 na honor di Prome Minister. E tempo ey e dirigentenan a expresa cu `Si no tabata pa e mandatario y su ekipo cu a percura pa santo, palo, klinkers y hopi mas, awe no tin e parke di baseball cu nan tin awe.” Durante e bishita recientemente, a constata cu e ekipo a sigui crece.

Antoine Kelly, coach di Grasshopper Aruba, tabata masha contento cu bishita di Prome Minister Eman. El a  mustr’e con nan a bay dilanti despues di a ricibi su ayudo y di su Gobierno. Awendia nan ta conta cu 135 hoben participando den e 8 teamnan cu ta hunga den diferente liga.

Ademas di un coach Cubano, Carlos Gonzalez, cu ta asisti e organisacion cu e aspecto tecnico di baseball, tambe Prome Minister Eman a pone na disposicion di e organisacion e talentonan di ex-basebolista di Grandes Ligas, Eugene Kingsale, kende ta trahando cu Gobierno den Team BoBario. “Nos ta hopi contento di a haya e chens pa bishita e veld di Ayo y Centro di Bario Ayo un biaha mas. Nos ta contento di mira con e team ta creciendo,” Eman a expresa. Kingsale ta duna clinica na e hobennan riba tecnicanan di baseball y disciplina cu ta yuda un basebolista yega leu na momento cu e dicidi di haci esaki su carera. Kingsale a hunga varios aña den Liga Grandi di Baseball na Merca.

Eman na final di su bishita a bisa cu su persona y Gobierno ta contento di por a contribui na desaroyo di e veld, dunando atencion na e deseo di e Centro di Bario Ayo mes. Den combersacion cu Rey Kelly a bini dilanti cu awor cu tin e parti di baseball cla, ta nan deseo tambe pa drecha e veld di futbol cu tin pega eynan mes. “Tin hopi hoben di Ayo y bisindario cu ta hungando futbol rond. Si e veld wordo traha, hopi hoben lo bin eynan. Ya caba a logra trece santo di diferente area unda cu tabatin limpieza pa nivela e tereno. Pues por yega na e veld di futbol asina desea y crea un organisacion diversifica pa deporte.” Hopi elogio e mandatario tabatin pa Rey Kelly y su yiu Antoine Kelly pa loke nan ta haci pa e hobennan di e area di Ayo. “Nan ta duna e hobennan e disciplina y motivacion pa crece den deporte.”

Prome Minister Eman ta sinti un orguyo grandi di e organisacion Grasshopper pa motibo cu el a mira con a lucha pa yuda hobennan y pa mehoracion di nan infrastructura. Tur e trabou cu a wordo haci di parti di e lidernan y otronan cu a duna un man ta basa riba e concepto di boluntarismo y comunitarismo cu e mandatario a bin ta promoviendo for di momento cu el a drenta su prome gobernacion na 2009.

Expresionnan haci den e articulo aki no necesariamente ta refleha opinion di ArenaPoliti.co