Minister Oduber a reuni na Panama cu Minister Rhuggenaath y Minister Him.

Linea di barconan crucero ta haciendo escogencia na bienestar di nan negoshi y hopi biaha ta re-ubica nan barconan sin tene na consideracion cu e destinacion cu nan tabata negoshando cu ne. Minister Oduber ta indica cu danki Dios pa Aruba esaki no ta e caso. Por mira cu e prome 2 lunanan pa 2016 manera a premira a bay sumamente positivo. Nos a conoce un crecemento di 30 mil turista, pero asina mes ta importante pa ta prepara pa futuro pa sigura cu Aruba ta keda un destinacion atractivo pa barconan crucero. Aruba su ubicacion geograficamente ta keda un reto pa atrae y mantene liñanan crucero interesa pa inclui nos isla riba nan iterinario. Minister Oduber ta mustra cu e cambionan grandi cu ta tumando luga na e waf na Oranjestad, awor cu a move e waf di container pa Barcadera cu esaki  ta crea mas oportunidad ainda pa combersa y tin aliansanan nobo. E mandatario ta den contacto estrecho cu su homologonan den nos region pa mira e posibilidadnan di traha hunto riba e reto den comun cu nos tin. Minister Oduber ta indica cu e acercamento a inicia cu un reunion ya caba for di aña pasa na Miami cu Presidente di Panama Sr. Juan Carlos Varela y Minister Gustavo Him. Intencion ta pa crea un iterinario atractivo incluyendo Panama, Colombia, Aruba y Curaçao.  Recientemente ehecutivonan gubernamental a topa na embahada di reino Hulandes staciona na Panama. Mientras e Minister di Colombia a disculpa su mes, Minister Oduber a topa cu Minister di Panama, Gustavo Him, Minister di Curaçao, Eugene Rhuggenaath, Embahador di reino Hulandes na Panama, Dirk Janssen, ehecutivo di Curaçao Port Authority, Raul Manota y tambe presente na e reunion aki tabata Sra. Ronella Tjin Asjoe directora di ATA. E mandatario di Aruba ta indica cu tur tabata riba un liña pa loke ta e strategianan cu lo kier sigui pa futuro. Un aliansa cu ta basa riba un MOU cu Minister President Eman a firma cu Panama aña pasa.

Durante e reunion a yega na acuerdonan pa cuminsa traha riba nan. Prome paso ta reuni cu diferente lineanan crucero cu ta biniendo Aruba y mira con lo por sostene otro. Sr. Oduber ta menciona cu Panama ta un pais grandi cu hopi posibilidad. No ta un secreto cu tin un inkietud grandi mirando e costo halto cu ta envolvi den pasa den e Panama Canal. Di otro banda Aruba ta ricibi riba 600 mil pasahero via barconan crucero mientras cu Panama ta ricibi 200 mil. Segun e mandatario tin un 'Win Win situation' su forma un aliado.

Un otro posibilidad ta pa crea na Panama un 'Home Port' mirando cu Panama tin e conexion cu Copa Airlines y lo ta un partner strategico den e plan pa crea posibildadnan grandi pa Aruba, Curaçao y Colombia.

Tambe a trece dilanti un opcion nobo cu lo por crea un tipo di rutina entre e diferente islanan cu ta ubica un poco abou, hunto cu esnan cu ta un poco mas cerca, crea un tipo di rotacion nobo cu lo inclui cu e pasahero lo por baha y keda 2 dia of mas, y despues subi e siguiente barco pa sigui pa e otro destinacionnan.  Esaki sigur lo ta un producto nobo cu lo por crea y lo haya atencion internacional. Minister Oduber ta indica cu e ultimo aki a keda presenta pa Aruba y cu a cay den hopi bon tera cerca e otro mandatarionan. Tur presente na e reunion na Panama a compromete di bay traha riba e puntonan treci dilanti a corto plaso mirando cu e lo ta na beneficio di tur e aliadonan.

Expresionnan haci den e articulo aki no necesariamente ta refleha opinion di ArenaPoliti.co