Parlamentario mr. Xiomara Maduro (MEP): Bo no por lombra wowo di Indjan mas cu spiel
![XM45](/images/2016-press/XM45.jpg)
Historia a sinia nos cu ora e Conquistadores a yega Aruba nan a lombra wowo di e Indjannan na nos Pais cu spiel y kraalchi. Awor ta parce manera cu historia kier ripiti na Aruba ya cu Baba kier bin lombra wowo di e Pueblo aki cu e ultimo rapport di CFT riba e cifranan di 2015 di Pais Aruba pretendiendo cu tur cos ta bon. Baba a lubida cu awendia Pueblo por lesa y compronde Hulandes tambe y pesey bo no por lombra wowo di Indjan mas cu spiel.
Mehoracion cu ‘kanttekening’
CFT den su rapport di 4 di maart 2016 tabata masha cla. E cifranan cu Gabinete Eman a presenta pa e ultimo kwartaal di 2015 ta mustra un mehoracion, pero CFT ta pone un ‘kanttekening’ ya cu e mehoracion aki ta algo incidental y no structural. E entrada extra cu Gabinete Eman a haya den december 2015 ta locual a pone cu Aruba por a alcansa y hasta keda bou di e norma pa e deficit manera poni den e Ley di CAFT. Pero e manera cu Gabinete Eman a yega na e entrada extra ta algo cu CFT ta cuestiona y pa cual nan a manda pidi mas informacion di Gabinete Eman pa nan por husga esaki mihor.
![160314 CFT kanttekening pag2](/images/2016-Q1/160314-CFT-kanttekening-pag2.jpg)
No ta solucion structural
CFT a scirbi riba pagina 2 di e rapport, cu e entrada incidental aki ta duna un bista un tiki otro di e realidad ya cu e problemanan di nos finanzas publico no por wordo resolvi di e manera cu e Gobierno aki a hacie. Ta un biaha Gabinete Eman por conta cu entrada extra door di a bende edificio di Gobierno, cobra belasting atrasa y exonera Gobierno di un debe di 60,5 miyon na SVB. Banda di esaki tur locual Gabinete Eman a cobra na belasting atrasa y na winstbelasting adelanta por medio di e VAS den december 2015, Gobierno no lo haya mas den 2016. Cu otro palabra CFT a indica cu e trikinan cu Gabinete Eman a haci pa yega na fondo publico den december 2015 no ta un solucion structural pa mehora e situacion financiero sino mas bien algo incidental.
Lombra wowo di Indjan cu spiel
Ta di lamenta cu Baba Herde ta lesa un frase so den henter e rapport di CFT, esta cu a base e cifranan preliminario di Gabinete Eman a logra yega y keda bou di e norma financiero di e Ley di CAFT, pero cu Baba no ta trece dilanti e ‘kanttekening’ na unda cu CFT ta indica cu locual a wordo haci den december 2015 no ta yuda yega na un solucion permanente pa e problemanan di nos finanzas publico. Di e manera aki Baba ta practica oportunismo poltico na unda e kier lombra wowo di In mdjan cu spiel. Pero Baba a lubida cu Indjan tambe por lesa y compronde Hulandes y no ta cay mas den e triki di laga hende lombra nan wowo cu spiel.
14 maart 2016
Expresionnan haci den e articulo aki no necesariamente ta refleha opinion di ArenaPoliti.co