Minister Oduber durante Manifestacion Cultural. 

Como Minister di Cultura, Sr. Otmar Oduber a hiba palabra pa inicia e Manifestacion Cultural riba Plaza Libertador Betico Croes. Un plaza completamente renoba unda e mandatario a tuma un rato pa gradici tur cu a yuda pa haci esaki posibel. Un Plaza Betico completamente yen di nos hendenan cu a bin pa celebra. Cu un emocion grandi Minister  Oduber a reconoce e celebracion grandi di 30 aña di nos Status Aparte y 40 aña di nos Himno y Bandera. E mandatario ta indica: "Ta 40 aña cu nos ta wak nos bandera ta bula y nos ta scucha cu hopi orguyo nos Himno na momentonan special y na momentonan cu nos ta recorda nos mes cu e pida baranca aki , a base di nos antepasadonan cu tanto a bringa  y lucha pa awe nos tin e libertad aki dentro di reino y nos por celebra tambe 30 aña di nos Status Aparte. "

Manifestacion Cultural ta inicia oficialmente e Celebracion Nacional oficialmente. Aunke e mandatario mes a indica cu Aruba ta den pleno celebracion ya caba for di inicio di luna. A inicia cu festival di un Canto pa Nos Himno y Bandera di nos hobennan, sigui pa Poeta di Patria y despues e festival grandi di un Canto pa Aruba.

Mirando cu nos ta den un aña historico a lansa un produccion unico, un bunita proyecto di Jonathan Vierra como obsekio pa nos Gobernador Sr. Fredis Rafunjol.  Mas cu 60 musico a unifica cantando nos Himno Nacional. Un produccion cu ta yena cada un di nos cu hopi emocion. Durante e manifestacion Cultural a toca na Minister di Cultura pa presenta e parti oficial unda Alidia Wever acompaña pa un gran cantidad  di musico y artistanan a presenta un anochi di cuentanan magico, cuentanan cu pa mas di 500 aña ta wordo conta den diferente storia pormedio di e diferente rasanan riba e isla asina importante aki cu nos ta yama nos dushi Aruba. Storianan di Amerindio , Africano te na e Europeo  y awor pa tur e nacionalidadnan existente cu ta bibando hunto den harmonia cu otro den pas y union aki riba nos pida baranca. tur esaki ta conecta cu otro. Esey ta haci nos asina diverso, asina creativo, gentil, amabel pero tambe perseverante pa yama nos mes un Arubiano. Nos ta conecta cu e lama cu ta baila sin descansa tur rond di nos planeta y cu a duna y ainda ta duna nos hendenan cumindanan saludabel pa come tur dia. Nos ta conecta cu e suela fertil di nos continente firme cu ta duna henter mundo di come, unabes awasero drama su bendicion riba dje. Nos cultura ta conecta. Cu su historia rico cu tempo a regala den malo y den bon, pasobra tur e conexionnan aki ta haci tur cu ta biba ariba e pida baranca aki un Arubiano. Un Arubiano conecta cu su Cultura.

Expresionnan haci den e articulo aki no necesariamente ta refleha opinion di ArenaPoliti.co