Prome Minister Eman: "Lidernan di antes a hiba nan lucha cu respet, sin rencor y polarisacion"
![160320 Mike](/images/2016-Q1/160320-Mike.jpg)
ORANJESTAD – Prome Minister Mike Eman a hiba un bunita discurso riba Plaza Monumento 18 di maart, unda e forma humilde con politico di antes tabata hiba politica en comparacion cu e situacion actual a resalta. Un ambiente mas humano y cu respeta pa otro sin cay den humiyacion.
Anticipando e fecha special 18 di maart, recordando 40 aña di Aruba su Himno y Bandera y 30 aña di su Status Aparte, tabatin un ceremonia riba Plaza Monumento 18 di maart riba 17 di maart. Riba e plaza nombernan di 2147 hombernan balente cu na 1947/1948 a firma un documento pidiendo pa Aruba ta “Baas den su mesun cas”. Un peticion cu a wordo entrega na Reina Wilhelmina y a compaña e mocion entrega door di Shon A Eman na Mesa Rondo dia 18 di maart 1948. Aki e fundeshi pa nos Status Aparte a wordo poni.
E ceremonia protocolario a conta cu presencia di Gobernador Fredis Refunjol, invitadonan di e islanan Hulandes di Caribe y di Hulanda. “Awe tardi ta un momento grandi pa nos pa para na pia di esnan cu a lidera pa nos e prome momento di gritonan di un Status Aparte pa pais Aruba. E lidernan aki, e.o. Shon A Eman, no a cana nan so pero cu un gran parti di e pueblo Arubano loke a keda como prueba den un acta notarial firma pa 2147 persona y entrega na Su Mahestad La Reina Wilhelmina. Un documento cu a keda presenta den e Prome Conferencia di Mesa Rondo, unda cu pa prome biaha e “Afzonderlijke Status” a haya su reconocemento,” Eman a expresa.
Den e parti di discurso na Hulandes, Prome Minister Eman a resalta e calidad di e politiconan di antes, cuminsando cu e perseverancia pa Status Aparte cu nan tabata kier pa Aruba, apesar cu nan a haya hopi biaha un NO duro riba nan peticionnan. Pero durante diferente generacion, e lucha a sigui, pa realisa e deseo di Aruba cu a keda concretisa riba prome di januari, 1986. ”Cada biaha cu nos recorda nan, ta bini dilanti e perseverancia, e curashi y e vision. Pero un tema cu kisas nos no ta señala suficiente di e lidernan aki ta e tolerancia.” Prome Minister Mike Eman a papia di polarisacion den politica di awendia, e forma con ta humiya otro. Pero tambe con ta discrimina ciudadanonan di otro rasa, den discusionnan politico, principalmente na paisnan unda democracia a nace. Pues awe no ta mira e tolerancia cu tabata existi cerca lidernan di antes. “Ta hopi special cu nos lidernan den tur nan frustracionnan, den tur nan confrontacionnan hayando poco atencion pa nan lucha y toch nan tabata asina convenci di e deseo profundo di e pueblo y nunca a baha nan mes na un nivel asina bou y tampoco a crea 'hetze' contra cierto grupo di e poblacion.” Mester reconoce e virtud aki di e politiconan di antes cu si tabata respeta derecho di otronan, apesar cu nan mes a wordo humiya y trata cu poco respet. Nan a sigui cu nan lucha cu respet y humildad."
E caracteristicanan di e lidernan di antes, ta loke a tipifica e habitantenan di e isla aki y cu a haci Aruba asina grandi den turismo. “Nos ta mira tur otro hende como un ruman of un amigo nobo,” Prome Minister Eman a bisa. Na final, el a remarca cu den e lucha di Status Aparte no mester lubida e curashi di e lidernan cu a demostra poco rencor y pa cual el a pidi un aplauso, caracteristicanan cu mester wordo sigui pa e generacionnan cu ta bin.
![160320 Refunjol GME](/images/2016-Q1/160320-Refunjol-GME.jpg)
Expresionnan haci den e articulo aki no necesariamente ta refleha opinion di ArenaPoliti.co