Prome Minister Eman na Plaza Libertador Betico Croes     

ORANJESTAD - E aña aki Aruba ta celebra cu 31 aña pasa el a haya su Status Aparte y dies aña prome cu himno, bandera y escudo. Na 1986 Aruba a bira un isla autonomo den Reino Hulandes. Na Aruba esaki a wordo recorda riba varios plasa y den varios forma. E acto protocolar a tuma lugar riba Plaza Libertador Betico Croes na Vondellaan den presencia di Gobernador Boekhoudt y su señora, di dignatarionan di Corsou, Sint Maarten y otro islanan den Reino, di miembronan di Parlamento y demas invitado. Prome Minister Eman a tene un discurso elocuente den cual el a papia di nos Status Aparte, pero su discurso tabata mas tanto enfoca riba patriotismo y e amor grandi cu nos tin pa Aruba cu no tin nada pa kibr'e.  

"Historia hopi bes ta algo riba papel, nos ta haya les den dje, pero e ta un poco invisibel", Eman a bisa na inicio di su discurso. "Ora nos ta para den e dianan aki na e diferente monumentonan cu recuerdonan profundo, nos curason ta acapara memoria di esnan cu no ta aki mas cu nos. Pero atras a keda nan labor y nan lucha pa e pais aki, nan cancionnan cu ritmonan cu den e dianan aki ta bin hunto den un harmonia increibel. Nos Creador ta obrando pa nos pais." Eman a conta con ora e mira e escudo e ta pensa riba e mensahe di e simbolonan riba dje y compara nan cu e realidad di awe no por conclui otro cu Aruba ta un isla bendiciona. "E wiel di industria cu pa un tempo no a draai, awe atrobe ta den completo renobacion. E mata di aloe cu tabata e industria principal di un tempo, a desaparece pa un temporada y awe e ta un di productonan mayor di exportacion di Aruba. E simbolonan di hospitalidad y cordialidad riba e escudo ta indica con Aruba awe ta un di e islanan Caribense cu e industria turistico mas fuerte y creciente y mas prometedor. "Cu realidadnan asina, un isla cu un historia asina profundo,  locual cu por ta parce invisibel, nos por toca y sinti den e obranan di leyenda aki cu nos grandinan a laga atras pa nos. Ora nos canta 'Aruba, dushi tera y di e stimacion cu nos tin pa e isla aki, berdaderamente no tin nada pa kibr'e. Tur esaki ta pasobra cu nos tabatin generacionnan di tata y mamanan cu a inculca esey den nos curason."

Eman, kende den su discurso a enfoca hopi riba e amor patrio, a bisa cu loke ta pone e isla Aruba cay y lanta bek ta e forsa y sentido di patriotismo aki. "E stimacion aki cu no tin nada pa kibr'e. E amor cu nos tin pa e baranca aki cu nos ta yama Aruba, dushi tera ta enorme. Ban brasa riba e dia nacional aki e stimacion patrio y haci'e mas profundo. E pilarnan cu ta carga e stimacion aki di lidernan politico, di dirigentenan di arte, cultura y escultura, cada un cu nan creacion ta yuda nos cu nan obranan di pasado y esnan cu nan visionnan nobo pa futuro ta duna nos e perspectiva di optimismo cu hunto nos por haci un diferencia pa e futuro di e pais aki. Historia ta duna nos suficiente confiansa propio pasobra nos a mira den cada faceta di e historia aki cu Aruba a sa di enfrenta cada reto cu orguyo y a sa di progresa mas hopi ainda cu locual mester a supera".

Expresionnan haci den e articulo aki no necesariamente ta refleha opinion di ArenaPoliti.co