DIA DI HIMNO Y BANDERA, UN DIA DI REFLECCION RIBA AÑA 2017:

Na ocasion di e celebaracion di dia di Himno y Bandera, UPP kier a para keto un rato riba kico realmente mester ta nificacion di e dia aki. Pa cuminsa UPP ta kere cu riba e dia aki nos mester celebra nos simbolonan di identidad cu ta supose di unifica e pueblo aki y laga e pueblo aki sinti orguyoso. Pero e mester ta tambe un dia di refleccion, riba henter e proceso di e lucha cu a tuma lugar te cu 1985 pa por yega na nos Status Aparte. E mester ta un dia di refleccion riba kico nos a haci cu e Status Aparte, e autonomia, cu bou gui di nos incansabel y inmortal lider Betico Croes den feliz memoria a wordo logra. 31 aña despues nos mester pone den balansa e resultado di e anhelo di nos grandinan y antepasadonan pa ta baas di nos mes cas.

UPP ta kere cu e saldo di esaki no ta alentador. Un debe astronomico cu na e momentonan aki ta yega 90% di nos GDP, esta di mas di 5 biyon florin. Proyectonan PPP cu a wordo benta pa futuro y cu otro aña e pueblo aki tin cu cuminsa paga y cu lo monta mas di 8 biyon al final, surpasando asina mas di 120% di debe di GDP. Nificando cu nos tin cu paga mas cu loke nos ta gana como pais.

E saldo ta bisa nos tambe cu Aruba  su capacidad di carga ya a wordo surpasa, tanto pa loke ta e cantidad di hende legal y ilegal cu ta biba aki na Aruba. E construccion for di control cu ta poniendo un presion enorme riba nos flora y fauna, nos madre naturaleza.

E saldo ta bisa nos mas aleu cu tin un deficiencia den nos sistema parlamentario, pa por a controla un gobernacion cu a bay for di sla. Metemento di Hulanda por medio di un KB y varios protocolnan, cu despues a bay den un supuesto entrega di nos autonomia den forma “voluntario” dor di parlamento y gobierno na Hulanda, esta CAft. Perdemento di respet di parti di Hulanda ora di nombra un gobernador pa Aruba, dor cu nos mes no a cumpli cu palabracionnan. E pensamento di un “toezicht” permanente riba finanzas publico y kizas hasta riba nos husticia.

Esaki ta e balanza cu nos tin di reflecciona riba dje. Un falta di atencion completo riba tereno di salubridad, enseñanza, seguridad, cultura, etc. Di e forma aki pecando contra nos constitucion, unda cu un gobierno ta obliga pa garantisa e derechonan basico di pueblo aki.

Considerando tur esaki y e hecho cu e aña aki nos ta recorda 40 aña di referendum riba 25 di maart y e accionnan di Augustus Scur na augustus, nos mester refleha riba e lucha y alavez puntra nos mes si nos kier sigui den e rumbo aki despues di september 2017. Nos por mira con awe ta bay tin un show atrobe pa loke ta sendemento di bela na Plaza 18 di Maart, pa loke ta e firmantenan. Pero loke no ta wordo bisa con e firmantenan aki a wordo traciona den e lucha aki, djis pa puesto di minister na 1948. Nos ta lamenta, cu un instrumento asina importante, manera un referendum, cu a produci un cifra di mas di 80% cu a scohe pa libertad, ningun momento y ningun caminda ta haya e reconocimento aki.

1977 sigur tabata un aña crucial den historia politico di e pueblo di Aruba. No unicamente a expresa su mes den un referendum pa su libertad, sino a subi caya na augustus 1977, pa pone Hulanda realisa cu Aruba tabata serio den su anhelo. Aruba a haya oido ora na september Conseho Insular di Aruba, hunto cu gremionan, a wordo ricibi na Den Haag. Y di e momento ey e bala a cuminsa lora cu a bin un cantidad di comisionnan na nivel di Reino y na nivel Antiyano, sin lubida esnan local, bou di un R.C.O.A. (Raadscommissie Onafhankelijkheid Aruba).

UPP ta kere cu dia di Himno y Bandera no solamente ta un dia di celebracion acompaña cu hopi fiesta, pero UPP ta kere tambe cu nos pueblo mester reflecciona riba e dia aki tambe, ya cu Aruba NO TA DI HUBILO na e momentonan aki. 

Tin un lucha nobo andando na unda cu nos prioridadnan mester ta pa duna espacio na bon gobernacion, basa riba e concepto di “Good Governance” y tambe Formacion y Educacion di nos hendenan pa asina crea ciudadanonan critico, pero na unda e ciudadanonan aki ta dedica esaki na nan pais, yena cu un sentimento di patriotismo fuerte, basa riba e concepto di “Good Citizenship”y Seguridad pa nos pueblo, na unda cada un di nos por sinti nos mes feliz atrobe, tanto den aspecto personal y laboral.

Aruba pabien cu nos dia Nacional di Himno y Bandera y ban reflecciona riba 2017 riba e rumba di e pais aki!

Partido UPP
Booshi Wever
15 di maart 2017

Expresionnan haci den e articulo aki no necesariamente ta refleha opinion di ArenaPoliti.co