KLM ta un di e aerolineanan  mas importante pa nos isla. Esaki a keda demostra na momento cu tabata tin un incertidumbre pa continuacion di su vuelonan pa cu nos isla. Den e tempo ey un delegacion encabesa pa e actual Minister President Mike Eman y Minister Otmar Oduber cu a logra convence KLM pa mantene Aruba riba nan iterinario. A traha duro pa mantene confiansa y sigui crece. Gobierno di Aruba a percura pa hopi proyectonan pa eleva e Producto Aruba, cual cu ainda ta continua den varios proyecto. Actualmente tin un enfoke special riba e expansion di e propio Aeropuerto Reina Beatrix. Mirando e ultimo desaroyo aki y cu e bon cooperacion ricibi, KLM ta confirma nan expansion di vuelonan pa Aruba. Minister Oduber ta comenta: " Caminda ta traha cu alma y cuerpo pa cosnan positivo esaki lo keda recompensa." 

Entre 8 di Juli 2016 pa 4 di september 2016 pa e ruta enter Amsterdam, Boneiro y Aruba, KLM lo aumenta su capacidad cu un Airbus 330-200 cu lo bula riba diadomingo. E cantidad di vuelo semanal entre Aruba y Amsterdam ta aumenta cu 6 biaha pa siman. Expansion di vuelonan di KLM ta significa mas oportunidad pa e mercado di no solamente Hulanda pero Europa completo. Hopi ta e pasaheronan cu ta bin for di Europa mester pasa via Hulanda pa nan por yega nan destinacion. Cu mas vuelo di KLM ta duna nan mas opcion pa yega nos isla.

E mercado Europeo nunca tabata e mercado di mas grandi pero tin tur potencial pa crece. Europa sigur ta keda un mercado importante pa nos isla tur forma cu lo por contribui na un aumento di e mercado aki ta mas cu bon bini.  

Relacion di KLM ultimamente ta uno hopi estrecho cu Aruba, unda tin comunicacion constante entre ambos partido percurando pa tur hende ta riba e mesun liña ofreciendo e miho servicio na nos bishitantenan pa por yega na e meta comun cu ta un crecemento di e cantidad di pasahero pa nos isla.

Confiansa di KLM den Aruba ta sigui crece y Minister Oduber ta hopi satisfecho cu e noticia aki y ta spera cu e cooperacion positivo sigui crece den futuro tanto pa KLM como pa Pais Aruba.

Expresionnan haci den e articulo aki no necesariamente ta refleha opinion di ArenaPoliti.co