Publicacion di e asina yama ‘Panama Papers’ a lanta basta stof y posiblemente lo lanta mas stof ainda. E pregunta cu Chichi tin ta: cu ki meta a lek e informacion aki? Kico tin na caminda, den sentido global, cu ta wordo precedi pa e lek aki?

Chichi ta sinti un tiki manera duda den e bos di Minister di Finansas, Sr. Angel Bermudez, pa loke ta trata envolvimento di Aruba den e supuesto scandal aki. Chichi ta duda cu si acaso actonan ilegal a wordo comete lo tin castigo pa esaki. Paso si ta Buchi su nomber ta riba lista di esunnan cu ta evadi pago na SIAD y cu ta uza ‘wasmashin industrial’ marca ‘Labaplaca’, probablemente nan lo dun’e tur loke ley ta prescribi como castigo. Pero ya...Sra. Husticia a cambia su maneho masha tempo caba...

Di tur e ‘erornan’ cu ta wordo cometi dor di hospital, poco ta sali den dia cla. Mayoria ta bay den ‘doofpot’ y e mannan cu ta riba e mesun barica ta soru pa e berdad keda scondi. Den caso di e mama di 22 aña cu, segun por a saca afo di e diferente publicacionnan, parce cu ya caba tabata morto ora personal di hospital a bin hay’e, ta despues di un siman e storia a bira publico. Loke Chichi no ta compronde ta con por ta cu hospital mes ta haci un investigacion. E investigacion mester ser haci pa un instancia neutral cu no ta envolvi cu hospital. Pero manera Chichi a bisa anteriormente... ta masha tempo caba cu Sra. Husticia a cambia su maneho...

Chichi ta corda cu varios biaha gobierno a papia tocante institui ‘Turismo Medico’ aki na Aruba. Esey lo ta un di e rasonnan pa expansion di e hospital tambe. Loke ta lubida di inclui den e proyecto di hospital ta un instancia unda e pashent su derechonan ta wordo tuma na serio y unda e tin caminda pa cana. Paso cu si ta asina ta bay trata cu turista anto di awo caba Chichi ta mira cu nos isla no ta bay scapa difamacion y debe di casonan perdi den corte, sin conta e consecuencia pa turismo en general...

Tanto Chichi como comer Ida ta masha tristo cu e maneho di Derechonan di Mucha aki na Aruba. Ta celebra Dia di Mucha, ta haci yen di beheit, tin telefon di mucha cu ta castra mama, papa y docente. Pero ora di actua ta tuma tur tempo di mundo pa haci un investigacion lubidando cu e victima(nan) ta den un situacion emocional/psicologico cu ta sigui haci daño na nan. Corda cu victima no ta unicamente e persona(nan) agredi pero tambe su famia y comunidad den su totalidad.

Anto Chichi a corda riba Mahatma Gandhi y loke e ta bisa tocante moral di un pais. Den e caso aki Chichi mester bisa cu si nos animalnan di stimacion mes nos ta maltrata, ta kico berdad ta keda pa nos muchanan? Ta asina ta cuida futuro di nos isla?

Chichi ta haya cu lo ta interesante pa puntra alumnonan di Colegio Arubano kico nan ta opina tocante asunto di e rector Hulandes cu a bay cu un ‘golden handshake’. Tambe lo ta interesante pa sa kico nan ta opina di e maneho di scol en general. Poco biaha, te unda Chichi por corda, alumnonan ta wordo envolvi den e tipo di cosnan aki. Ta tempo pa e studiante bira mas asertivo. Paso ta un hecho cu e badabadanan aki ta afecta e alumno su estudio.

E siman aki tin varios reunion publico di Parlamento. Chichi cu comer Ida lo asisti na ‘ring side’ pa no perde ni un palabra. Laga nos spera cu tur cos ta bay serio y cu tur hende lo sa di comporta nan mes. Ta hopi cos tin pa drecha y campaña pa eleccion di otro aña a cuminsa caba...


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co