Parlamentario mr. Xiomara Maduro (MEP): SVB a traha amienda pa Fraccion di AVP por scapa cara politico dilanti e trahadornan di Aura Casino
Parlamento a trata e cambionan den e Ley di SVB pa asina por legalisa e ‘triki’ di Gabinete Eman den cual nan ta libra nan mes di un debe di 60 miyon florin na SVB y asina por presenta cifranan financiero mas bunita na CFT. Cu e cambio di Ley di SVB, Gabinete Eman lo kier scapa no solamente nan cara financiero pero tambe kier scapa nan cara politico. Pa e ultimo aki, SVB a traha un amienda pa asina yuda Fraccion di AVP scapa cara politico di Gabinete Eman dilanti tur esnan cu debi na mal maneho di e Gobierno aki ta perdiendo nan trabou, incluso e trahadornan di Aura Casino.
Cosnan positivo pa sconde triki
Manera premira, Gabinete Eman pa por legalisa e ‘triki’ na SVB, a recuri na manipulacion atrobe door di core hinca facetanan positivo den e Ley pa por evita cu opocicion vota contra. Y si acaso opocicion vota contra mes, e ora por sali bay afor pa critica cu opocicion ta contra locual ta positivo. Esey ta netamente locual a pasa tambe durante e tratamento di e cambio di Ley di SVB. Fraccion di MEP a vota contra pa legalisa e ‘triki’ di Gabinete Eman, y ata Minister Paul Croes y su ‘bende’ ta sali critica MEP.
Amienda pa saca cara politico
Remarcabel ta cu durante e segunda tanda di e reunion, Fraccion di AVP a presenta un amienda cu despues a resulta di a wordo traha door di SVB y no e parlamentario cu a presente. E amienda ta regla entre otro pa hisa e suma di cesantia cu esnan cu ta perde trabou ta haya den nan man. Cu e amienda aki SVB a yuda Fraccion di AVP pa saca cara di AVP y Minister Paul Croes dilanti tur esnan cu ta perdiendo trabou debi na e mal maneho di Gabinete Eman. Pasobra ta conoci cu Minister Paul Croes mes no a haci nada pa yuda e trahadornan di Aura Casino. Ta bou di precion di critica di MEP, e mandatario a core busca un manera pa scapa su cara. Na e dunador di trabou mes, Minister Paul Croes no por a acudi pa exigi pago di salario atrasa, ya cu ora cu bo ta ‘wine and dine,’ haci evento na grandi den ballroom, of keda gratis of pa ‘zachte prijs’ na hotel, dificilmente bo ta resta autoridad moral pa atende cu e donio di trabou pa exigi pago di e trahadornan. Pues no a keda nada mas cu recuri na SVB pa traha amienda pa hisa e suma di cesantia y di e manera aki scapa su cara politico y esun di AVP dilanti e trahadornan di Aura Casino.
MEP a sostene e subida di cesantia
Contrario na locual Minister Paul Croes ta declara, MEP a sostene e amienda traha pa SVB ya cu MEP desde prome momento a sali pa yuda e trahadornan di Aura Casino y tur otro cu ta perdiendo nan trabou. Locual MEP no ta sostene ta e cambionan pa legalisa e ‘triki’ di duna Gabinete Eman despensacion pa e debe di 60 miyon na e fondo di SVB.
29 april 2016
Expresionnan haci den e articulo aki no necesariamente ta refleha opinion di ArenaPoliti.co