Diamars mainta na Cuba hunto cu delegacion di Aruba Minister Otmar Oduber tabata presente na e apertura di e di 60 conferencia regional di Americanan di UNWTO (United Nations World Tourism Organization). Minister Oduber a hiba palabra na e congreso splicando un poco di e maneho cu Aruba pa hiba pa cu e industria aki, un industria cu a conoce cambionan. Turismo ta un industria hopi dinamico y lo keda conoce cambionan significativo cu lo incentiva nos pa sigui desaroya keda pensa den formanan creativo como tambe innovativo. Cambionan manera den poder economico, cambionan demografico y social, aparicion di biaheronan nobo, generacion di milenio, avancenan tecnologico, cambionan climatologico rapido cu ta rekeri nos atencion tur ta diferente factornan cu ta rekeri nos compromiso ora di desaroya e maneho turistico na beneficio di nos bishitantenan, pero mas ainda na beneficio di nos comunidadnan. Un di e motibonan clave cu  nos taki y un di e factornan importante cu nos a dicidi di tin turismo como nos pilar economico principal ta pa ofrece felicidad na nos hendenan y na su turno lo resulta den bishitantenan feliz. Esaki ta un meta crucial pa Aruba.
Aruba ubica den e parti zuid di Caribe, parti di Reino Hulandes y hogar di 110 mil persona, a haci e compromiso pa desaroya e sector di turismo mas di 50 aña pasa. Awendia Aruba ta ricibi cerca di 2 miyon turista a base anual. Turismo sigur a percura pa cifranan positivo pa nos isla contribuyendo economicamente na nos GDP y nos hendenan.
Locual ta haci Aruba unico segun "World Travel & Tourism Council" ta cu for di 184 pais Aruba ta na prome luga pa locual ta paisnan cu ta conta cu un contribucion relativamente respeta di turismo na nos GDP di cual ta haci cu nos ta depende di e industria aki primordialmente. Mientras cu tur esaki ta indicadornan clave awor nan lo keda complementa cu un forma di midi felicidad di nos hendenan. Awe Aruba por ta para na e di 60 edicion di e conferencia di UNTWO bisando cu nos ta desaroyando un industria turistico conforme un maneho sostenibel y responsabel. Nos isla a haci un compromiso y ta midiendo e indice di felicidad desde 2011. Minister Oduber a urgi pa adopta e maneho midi e indice di felicidad como parti di e maneho di turismo na cada un di e paisnan presente, mirando cu e ta cuadra cu e maneho di e Secretario General di UNTWO,  dr. Taleb D. Rifai. Aruba ta un di e poconan cu a haci esaki pero nos tin cu tuma un posicion conhuntamente pa asina reconoce su importancia y con esaki lo conduci na bienestar di nos hendenan mirando cu e curason di e industria aki ta e capital humano. Ta nos hendenan ta esnan cu ta comunica y conecta cu  nos bishitantenan. E ta e conductor principal di  e negoshi cu nos ta aden. E intercambio entre nos hendenan y nos bishitantenan ta un fusion cultural, habitonan y forma di pensa. Herencianan tangibel y intagibel ta haci cada un di nos unico y cual ta haci biahamento asina bale la pena. Stimulando e autenticidad aki y treciendo e mas cerca di nos bishitantenan, y e combinacion di cultura cu turismo ta esencial pa un desaroyo sostenibel y na final felicidad. Probechando e ocasion a invita tur colega pa e conferencia Happiness 360 cu lo tuma luga na september na nos isla cu ta wordo organisa conhuntamente cu UNWTO cu lo enfoca riba felicidad y integracion di turismo cu cultura. Dr. Taleb D. Rifai, Secretario General di UNTWO, lo ta un di e oradornan invita pa Happiness 360 pa sigui elabora riba e tema aki.  

Expresionnan haci den e articulo aki no necesariamente ta refleha opinion di ArenaPoliti.co