E Comicionnan di Salud y di Husticia a reuni diamars atardi cu Fundacion Lisette Gomez riba tema di abuso di mucha. E reunion aki a wordo yama despues cu dia 27 april ultimo tabata tin un manifestacion pa pidi Parlamento y Gobierno atencion pa e problema serio aki cu ta reina na nos Pais. E Fundacion a trece nan preocupacionnan dilanti manera cu a keda poni den e manifesto entrega dia di e manifestacion. Remarcabel ta cu hopi preocupacion treci dilanti tabata conoci caba na 2010 ora tabata tin un manifestacion y entrega di 11 mil firma na Parlamento, pero lamentablemente debi na prioridad robes di Gabinete Eman pa 6 aña largo no a haci mucho pa atende cu e preocupacion riba abuso di mucha debidamente.

Klinker enves di hende
Gabinete Eman su prioridad tur e añanan aki ta mas dirigi riba pone klinker y e hende mes no ta worry mucho cune. Esaki tin como consecuencia cu problemanan social ta bira mas grandi. Ya na 2010 a pidi atencion pa e problematica di abuso di mucha. E tempo eynan ya caba tabata conoci cu mester atende cu falta di personal, falta di fondo, falta di protocol y falta di un punto central pa entrega denuncia y haya ayudo. Pero Gabinete Eman su Ministernan di e cartera Social no a haci mucho pa atende debidamente cu e problematica aki. A haci basta show y por lo otro Gabinete Eman a concentra riba ponemento di klinker enves di atende debidamente cu e problemanan real cu nos muchanan ta birando victima di dje.

Mas concientisacion
Pa atende cu e problematica di abuso di mucho ta necesario pa bin cu mas concientisacion pa asina no solamente mayornan pero sigur e muchanan for di chikito caba ta conciente di e peligernan cu por existi pa nan y cu wordo haci door di esnan serca di nan. Banda di esaki mester bira conoci pa comunidad en general y specialmente pa mayornan y pa tur esnan cu por yega den contacto cu casonan di abuso di mucha, unda ta e punto central cu mester acudi ora un caso lamentable asina presenta. Mas concientisacion ta necesario y eynan tambe Gobierno mester hinca mas esfuerso na nos parecer.

Un reunion publico
Na final di e reunion Fraccion di AVP a indica di bay yama un encuentro publico cu e Ministernan responsabel pa asina nan duna cuenta kiko a wordo haci cu e recomendacionnan cu e Comicion Special di Parlamento riba Abuso di Mucha a duna Gobierno na 2010. Nos di Fraccion di MEP ta di opinion cu ta un reunion publico mester wordo yama riba e tema aki, ya cu den un encuentro Parlamento no por entrega mocionnan den cual ta duna Gabinete Eman puntonan concreto di mehoracion. E tema di abuso di mucha merece di wordo trata cu prioridad y cu e seriedad debido y no por warda otro 6 aña pa algo wordo haci.

3 mei 2016

Expresionnan haci den e articulo aki no necesariamente ta refleha opinion di ArenaPoliti.co