Evelyn Wever-Croes (MEP): Fitch ta mantene e down grade di BBB-
![FraccionMEP19](/images/2016-press/FraccionMEP19.jpg)
Gobierno di Mike Eman a compromete cu e ABB y financial transfer tax
STA CRUZ -- Recientemente e agencia di credito financiero a duna su evaluacion di e situacion financiero di pais Aruba. Apesar di tur e medidanan, apesar cu nos ta bou di curatela di Hulanda, apesar cu gabinete Mike Eman a compromete pa bin cu mas medida, toch asina mes Fitch no a haya motibo pa upgrade e rating financiero di Aruba.
E importancia di esaki ta pasobra a base di e rating di e agencianan aki, banconan por prestabo na interes mas abou. Si bo rating ta malo, banconan ta cobra bo mas interes.
Tempo cu MEP a sali di gobierno na 2009 e rating tabata A- pero debi na mal maneho di gabinete Mike Eman Fitch a DOWNGRADE Aruba na BBB-, y awor a dicidi di mantene e downgrade di BBB- Apesar cu minister di turismo ta broma cu turismo ta bai bon, apesar cu nos a perde nos autonomia y nos ta bou di curatela di Hulanda, apesar di tur e medidanan cu gabinete Mike Eman a suta pueblo cun'e y esunnan cu ta na caminda, AINDA Fitch no ta confia e situacion pa mehora e rating y pone bek riba A manera tempo di MEP.
MAS MEDIDA
Locual ta mas alarmante ta cu gabinete Mike Eman a compromete cu Fitch cu lo bin cu mas medida, pa asina evita cu Fitch ta duna un pronostico negativo. Especificente Fitch ta
menciona den su rapport e ABB y e Financial Transfer Tax! Kiermeen dos medida cruel na camind ainda. "Mi tin un mensahe pa Mike Eman, unda cu bo ta biahando rond di mundo. Lubida di suta pueblo cu mas medida. MEP kier ALTERNARIVA, no MEDIDA. Lagami splica e alternativanan cu MEP ta propone: 1) baha cantidad di minister bek na 7, 2) baha cantidad di coordinador, 3) baha poco gasto di biahamento y fiestamento y bo ta scapa 50 miyon florin sin cu mester bin cu ABB. Mike Eman mester baha su gastonan di luho y saca for di su cabes pa suta e pueblo aki cu mas medida" segun Evelyn Wever-Croes, lider di MEP.
Expresionnan haci den e articulo aki no necesariamente ta refleha opinion di ArenaPoliti.co