Minister Oduber ta satisfecho di con Aruba a sa di resalta te hasta den acuerdonan firma 

Aña pasa a bishita Cuba cu un delegacion di Aruba unda despues a continua un dialogo extenso y trabou cu a conclui den firmamento di algun acuerdo entre e dos paisnan. A firma algun MOU pa asina concretisa tur e puntonan discuti. For di diferente ministerio y tambe for di e ministerio di inversionnan exterior por a scucha cu e bilateralnan ta completamente diferente mirando cu dibiaha tabata tin accionnan cu a tuma luga, mirando cu un trabou proactivo a bin ta tuma luga riba e diferente acuerdonan. Den cada seccion a palabra tur e agendanan di antemano kico nan ta bay ta sea ta den transporte, den agricultura of den cultura. Cada un di nan a palabra adelanta kico ta bay tuma luga. E mandatario ta indica cu cada minister cu a reuni cu ne a bisa cu ya no tin obstaculo mas a crea mesa di trabou, comision a wordo instala, nombernan a wordo menciona, a pone "deadlines" caba y awor mester cuminsa cumpli cu e palabracionnan riba cada un tereno. Pa loke ta trata e aspecto turismo y crucero, tambe a stipula deadline pa reunionnan tuma luga pa mira e resultadonan. Pa e aspecto di Cultura a pone claramente kico e materianan ta bay ta, kico e agendanan ta bay ta, cu un accion hopi agresivo su tras, cu intercambionan cultural cu ta bay tin den e diferente eventonan cu lo tuma luga durante e aña aki.
Hopi biaha ora firma cierto acuerdonan, gobiernonan ta pone un banda pero e biaha aki Minister Oduber orguyosamente ta menciona cu e MOU nan ta asina bon prepara cu asina cu e acuerdonan keda firma por cuminsa mesora cu e mesanan di trabou.

Por spera hopi movecion cultural awor cu e acuerdonan firma. E mandatario ta remarca e forma con Cuba di un edad hopi jong caba ta fomenta e balor di cultura. Conhuntamente cu organisacionnan local di Aruba lo traha cu expertonan di Cuba pa entre otro mira con lo por yega den un forma masal pa crea e interes cerca nos hobennan. Minister Oduber ta indica cu CUBA sigur lo por duna nos un man den e aspecto aki. A toca tambe e tema di nos monumentonan, unda Cuba a demostra su experticio. Kier busca un forma con pa baha gastonan pero mantene e calidad halto cu nos a bin ta renoba nos herencia nan tangibel. Aruba tin hopi experiencia pero semper ta bon pa keda explora otro opcionnan. Minister ta menciona cu nunca ta laat pa siña di paisnan cu ta haci den un forma hopi mas simpel pero cu ta resalta e cultura enormemente, creando asina henter un otro angulo. Edificionan di Cuba sigur ta un di e atraccionnan hopi grandi na Cuba, Minister Oduber ta indica cu pakico no siña di esnan cu ta haci esaki pa hopi mas aña cu nos.
E mandatario ta indica cu e Ministernan na Cuba a gusta e forma activo y te hasta agresivo den e forma con a prepara e MOU nan. A prepara riba tur tema hopi pro activo, creando comisionnan cu diferente directornan di departamentonan na Cuba, a prepara plannan cu hecho, y esaki sigur a pone Aruba resalta compara cu otro acuerdonan cu a yega di cera anteriormente cu otro paisnan. Minister Oduber a keda hopi satisfecho cu tur e reunionnan, e ta sigur cu esaki ta un paso mas pa conserva nos raiz, nos cultura, pa nos por pasa esaki pa nos futuro generacionnan.

Expresionnan haci den e articulo aki no necesariamente ta refleha opinion di ArenaPoliti.co