Cada biaha ora pueblo pensa cu awor si algun politico tradicional a yega na nan limite di barbaridadnan politico, ainda pueblo ta keda asombra pa mira cu nan por supera esun anterior. Algun hende lo yama e habilidad destructivo aki un talento, pero en realidad e ta un trastorno mental bergonsoso hopi serio. Politiconan asina, pueblo mester core cu nan lihe, prome cu nan sigui contagia mas persona den e sociedad cu e malesa destructivo aki.

Cu tin algun persona cu ta pensa cu e ta mucho laat pa para e decadencia di moralidad, esey ta sigur. Pero kico ta e alternativa? Laga e destruccion y decadencia di moralidad sigui? Sigui para un banda y acepta tur cos? Sigui keda kere cu esaki realmente ta democracia y progreso? Of cuminsa pensa cu nunca e ta laat y cu tur dia ta un comienso nobo. Tambe lo yuda pensamentonan manera: Mi persona no a wordo lanta manera un cobarde of hipocrita. Mi persona si a wordo lanta cu norma, balor, respet y amor pa su prohimo. Of mi ta un persona integro y ta mi deber civico pa rechasa ladronicia, decadencia moral y tur forma di abuso.

E fenomeno mundial di politiconan no integro y cu no tin e interes di pueblo na pecho, no ta algo di Aruba so. E ta pasa na tur parti di mundo. Pero esey no kiermen of por hustifica cu locual ta pasa na otro partinan di mundo, nos tin cu tum’e over y acept’e aki. Aruba ta un isla hopi chikito cu un economia simpel y vulnerabel. P’esey e por wordo destrui hopi lihe y facil. Unabes cu algo wordo destrui, ta destrui e ta keda y lo costa hopi pa reemplas’e of drech’e. Pero hamas e lo keda manera antes.

Ultimo añanan e destruccion di Aruba a wordo acelera, y awendia pueblo por nota e efectonan di esaki. Mas ‘Cheap labor’. Mas desempleo. Mas cuponan di trabou temporal y no duradero. Mas pobresa. Mas insiguridad. Mas ladronicia y criminalidad. Mas enrikecimento personal cu fondonan publico. Mas hende disgusta y intolerante. Mas agresion. Mas hende cu e sentimento cu nan a bira un ciudadano di segundo clase. Y mas politiconan cu a drenta politica cu 10 florin den nan saco y awendia ta miyonario.

Awendia parce cu tin hasta un competencia entre e mandatarionan pa wak kende por hinca e pueblo den mas debe. Algun ehempel: E conciertonan miyonario di Aruba Tourism Authority a wordo supera pa e 300 miyon di e ‘WEB-Hedging’. Esaki na su turno a wordo gana pa e proyectonan di ‘Caminda Scur’ di 750 miyon y esun di ‘Watty Vos Boulevard’ di 835 miyon. Mientrastanto nan tambe a wordo surpasa pa e proyecto di expansion di hospital di 1 biyon florin. Pa nos no lubida e competencia di kende por duna mas ‘krabbeltjes Dezerzijds akkoord’.

Tur esaki por pasa, pasobra esun cu a introduci e decadencia moral acelera, entre otro cu su ehempelnan di ‘bay djis un tiki rood’ y ‘green’, nunca ta na Aruba. Y ora cu si e ta na Aruba pa un rato, e ta mas ocupa cu su shownan y e planeamento di su siguiente ‘tripnan’, enbes di goberna. Pues si e lider mes ‘don’t care’, anto e lo ta dificil pa pensa cu su team, si lo ‘care’. Un parti di pueblo a scoge pa show, comedia y drama. Wel ta drama mes gobierno ta duna nan pa tapa cuanto placa ta disparce dilanti pueblo su wowo, manera aire. Ki show. E unico problema di esaki ta, cu e show di drama aki ta costa hopi placa. No nan placa, pero NOS PLACA!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co