E siman aki sra Evelyne Wever-Croes y mi persona a representa Fraccion di MEP den e reunion cu e ehecutivonan di Standard & Poor’s (S&P) riba e situacion financiero di nos Pais. Den e reunion nos di MEP a trece nos preocupacionnan dilanti riba entre otro e falta di transparencia di Gabinete Eman pa locual ta cifranan. E diferencia grandi entre cifra presenta pa Banco Central y Gobierno pa locual ta e deficit di 2015 ta un muestra di intransparencia cu a keda un misterio sin por wordo resolvi.

Nos a expresa tambe nos preocupacion pa e falta di confiansa cu ta reina na nos Pais debi cu nos no tin un Minister President pa guia y tuma decicion na nos Pais. Ta algo cu no solamente nos ta cuestiona, pero e ta un preocupacion cu hasta CFT a haya importante y relevante pa raporta riba dje. Tin hopi confucion y instabilidad fiscal na nos Pais. Ningun hende sa si Gobierno ta bay hisa BBO mas of si ta bay introduci e tranfers tax y e ABB. E supervicion financiero di Gabinete Eman door di CFT tampoco a trece siguransa cune pa nos Pueblo, ya cu hopi a pensa cu CFT lo a bin pa stop e abusonan financiero di e Gobierno aki, pero ta un poco so nan a logra ‘slow down’ Gabinete Eman di malgasta fondo publico.

Nos a trece dilanti tambe e preocupacion pa e costo di bida y e ‘cost of doing business’ cu ta birando mas caro na nos Pais.E ultimo aki ta core cu inversionista. Hunto cu esaki nos a splica tambe di e hecho cu e Gobierno aki ta ‘tax away’ nos turismo cu e tantismo belasting cu ta cobra turista y e hecho cu nos ta hinca hopi placa den mercadeo y asina mes nos no ta atraendo e turista afluente pa nos Pais cu ta laga hopi placa atras pa lora nos economia.

Esaki nan ta algun punto cu nos a discuti riba nan durante e reunion cu e ehecutivonan di S&P. E rapport mes di e evaluacion di Aruba lo keda cla na fin di mei of comienso di juni 2016. Ta di spera cu S&P no bolbe degrada e score di nos Pais debi na e mal maneho financiero di Gabinete Eman. Aki tambe sigur lo hunga un rol e hecho cu Gabinete Eman ta bou di supervicion di Hulanda y esaki lo mester duna inversionista suficiente siguransa cu nos Pais lo por cumpli cu e inversionistanan interesa den nos Pais.

12 mei 2016

Expresionnan haci den e articulo aki no necesariamente ta refleha opinion di ArenaPoliti.co