Riba tera y bou di tera tambe 

ORANJESTAD – Mientras cu proyectonan grandi manera Hospital nobo y Green Corridor ta avansando, tin otro trabounan menos visibel, pero mesun importante, cu tambe Gobierno ta percurando p’e. Un ehempel ta e sistema di riool den Oranjestad cu pa decadanan tabata warda un actualisacion necesario. Minister di Infrastructura, Benny Sevinger ta e persona encarga di planea, coordina, ehecuta y supervisa tur e esfuerzonan aki.

El a splica cu “e rednan aki ta hopi bieu y mester inverti den nan pa mantene nan den bon condicion. Tambe tin plan pa conexionnan nobo.” Consciente di e peso cu e trabounan aki tin riba e finanzas publico, e titular di Infrastructura a duna di conoce cu “poco poco y un pa un nos ta purba di pone riba presupuesto pa cada rato haci un parti nobo.”

Caya Grandi ta un ehempel di con importante e restructuracion di e sistema subteraneo ta pa un ciudad. “Eynan nos a haci no solamente e parti di riolering y e awacero cu tin cu bay su luga, pero tambe nos a pone tubo di gas, coriente, comunicacion, tubo di awa, etc.; tur esakinan pa dia di mañan nos no mester kibra e caya mas.”

InfraTeam y DOW ta haciendo un trabou inmenso pa sigui embeyece Aruba. E vision di e Gobierno aki, for di momento cu a drenta, ta pa drecha e producto Aruba. Minister Sevinger: “Si bo wak den ultimo añanan cuanto proyecto di infrastructura e gobierno aki a haci, ta cosnan cu bo por wak…bo por sinti’e. Pueblo por wak unda su placa ta bay.” E mandatario ta reconoce cu esaki por alarma esnan pendiente di finanzas, pero di otro banda tur placa ta wordo inverti riba Aruba mes.

“Esaki ta di sumo importancia pa nos pais por yega na e siguiente nivel. Nos ta haciendo e proyectonan grandi aki plus esnan chikito di importancia,” asina e Minister di Infrastrutura ta sigura. E renobacion completo di Oranjestad cada bes ta mas visibel. Riba e mesun dia cu a wak e trabounan di e sistema di riool banda di Sun Plaza, tambe Minister Sevinger hunto cu Prome Minister Mike Eman a bay wak e construccion andando.

A cana wak y papia cu trahadonan trahando duro den e siguiente fase di Schelpstraat cu ta conecta cu e Welcome Plaza banda di waf y tambe ta trahando riba e area di Rancho. E ultimo aki ta actualmente den proceso pa su destaho publico. “Poco poco henter e area di Oranjestad, tanto bou tera como riba tera; ta yegando na un momento cu nos ta wak con e ta dunando su fruto.” 

Expresionnan haci den e articulo aki no necesariamente ta refleha opinion di ArenaPoliti.co