Minister Otmar Oduber a reuni un biaha mas cu AHATA. 

Diahuebs mainta Minister Otmar Oduber a reuni un biaha mas cu AHATA pa papia riba e tema di regulacion di All-inclusive. Un reunion cu a bay den bon ambiente, unda a bin un proposicion di parti e operadornan di hotel.

Minister Oduber a percura pa tur cu a traha riba e ley di All-inclusive tabata presente durante e reunion aki. Entre otro huristanan di e diferente buffetnan di abogado,ministerio di Turismo, miembronan di oficina di turismo y tambe Directie Wetgeving.

Manera ta conoci den e ultimo simannan aki a reuni cu diferente gremionan unda a dialoga extensamente riba e proposicion di ley pa cu regulacion di acomodacionnan All-inclusive cu lo keda trata dentro di poco den Parlamento di Aruba. Minister Oduber ta indica cu den comunidad ta reina e sentimento cu regulacion di e fenomeno di All-inclusive mester tuma luga. Mester percura pa mantene un balansa saludabel cu a sa di traha pa turismo di Aruba te cu awor. Regulacion di All-inclusive ta pa evita crecemento rapido di e cantidad di cambernan di acomodacion tipo All-inclusive den e inventario total riba nos isla. E mandatario ta expresa cu tin varios instancia cu a manda carta pe demostrando nan aprobacion pa legislacion di e regulacion aki.  "Aki no tin discusion di kico Minister ta desea pero kico ta bon na bienestar general di Pais Aruba" Sr. Oduber ta comenta. Tin varios rapportnan internacional riba e efectonan negativo cu ta bin cu un aumento di All-inclusive pa cu comercio di e destinacion cu ta scoge pa bay den e direccion di All-inclusive Resorts. Mas cu esey recientemente un propietario di negoshi estableci den un hotel All-inclusive aki na Aruba a bolbe vocifera su experiencia negativo pa cu su restaurant. "Ta efectonan cu sigur nos kier evita pa nos comercio local. Nos ta traha na bienestar general di nos comunidad. Ta comunidad ta vocifera su mes riba e tema aki unda a mustra cu mas All-inclusive no por wordo permiti aki na Aruba."

E mandatario ta reitera e pensamento cu na mesa ta unda ta yega na alternativanan, solucionnan y si no por yega na solucionnan, lo purba yega mas cerca di un consenso cu ta posibel. Lo reuni un biaha mas dialuna awo pa mira si por yega na otro prome cu trata e ley aki den Parlamento di Aruba.

Expresionnan haci den e articulo aki no necesariamente ta refleha opinion di ArenaPoliti.co