Nos digno pueblo di Aruba ainda no por kere locual a pasa den Parlamento di Aruba. Unda cu dos parlamentario di e partido den gobierno (AVP) a agredi otro fisicamente. Un falta di respet pa nos democracia y alaves un scenario mahos pa e organo di mas halto di nos pais. E solo echo cu esaki a pasa e dos parlamentarionan aki,  mester ta motibo pa tuma honor na nan mes y entrega nan retiro per direct. Señora Marisol Lopez-Tromp como Presidente y Sr. Chris Dammers como Vice presidente. Mirando e tipo di democracia cu nos tin na Aruba unda cu Parlamento constitucionalmente por manda un Gobierno cas, e ta algo grave pa nos estado di derecho ora cu den e organo mes tin comportacion violento enbes di dialogo. E Presidente a hasta entrega un keho oficial contra Sr. Dammers. Segun Sra. Lopez el a ricibi un golpi di mokete den su cara door cu el a reclama Chris di a surpasa e presupuesto di Parlamento sin su aprobacion. Algo cu tur hende na Aruba sa cu e Gobierno di Mike a presta y malgasta biyones na un manera iresponsable. E actitud di Chris Dammers di a gasta mas placa sin aprobacion ta refleha e actitud y mentalidad di e partido na mando. E abuso aki mester wordo rechasa totalmente mirando cu parlamentarionan tin cu mustra un bon ehempel na e pueblo di Aruba. Marisol, un ex-miembro di MEP mester saca su conclusion. Movimiento Electoral di Pueblo a dun’e e oportunidad di bira miembro di Parlamento pa 4 aña y 8 aña como Minister den gobernacionnan di MEP. Nunca Marisol mester a yama su casa bin defende den 12 aña como miembro di MEP. Nunca Marisol su casa mester a papia palabra malo contra niun hende di MEP. Sr. Mike Eman a probecha di e situacion interno di MEP na 2009 y a buta Marisol riba su lista berde y a hacie Presidente di Parlamento cu un proposito Machiavelino. Tur cos tawata bayendo bon pa Sr. Eman te cu Marisol a vota contra e presupuesto di 2015. Mi ta sigur Mike tin su plan pa Marisol mescos el a haci cu ex-Minister di Finansa Sr. Juan David Irausquin cu tambe a vota contra e presupuesto di AVP na 2011. Awe e ta sinta na cas ta cobra un schat di placa riba custia di pueblo. Den AVP no ta existi democracia y bo no por tin un diferencia di opinion pasobra nan lo caba cu bo. Marisol den MEP a hasta wordo conoci pa un brug pa su madushi pero hamas el a wordo agredi fisicamente. Ken lo agredi Marisol den e ultimo aña di gobernacion di Mike? El a saca Sra. Xiomara Ruiz Maduro cu polis, un representante di pueblo, el a buta polis para tras di nos Lider Sra. Evelyn Wever Croes den reunion di Parlamento, awo el a haña un tiki di e mesun trato cu el a usa contra otro fraccion. Mi ta spera Marisol siña un les di tur esaki cu poder no ta pa semper y tur cos tin su comienso y su fin. Alavez Marisol no mester lubida cu tabata su propio colega di partido, lider di fraccion di AVP, sr. Rene Herde a papia palabra malo y vulgar contra dje durante un reunion di Parlamento.

Y awo e lo mester pidi permiso pa su casa protege durante e resto di termino cu e ta fungi como Presidente pasobra ta bisto cu Parlamento no ta un lugar sigur mas, ni pa Marisol y sigur no pa e fraccionnan den oposicion.

Expresionnan haci den e articulo aki no necesariamente ta refleha opinion di ArenaPoliti.co