Contenido di acuerdo mester worde studia, analisa y interes general sirbi prome ……..
Un dos siman atras, gobierno p/m di nos Ministro Presidente sr. Mike Eman y nos flamante ministro di Energia ing. Mike de Meza alias ”The Mess” a anuncia cu Aruba su gobierno a jega na un acuerdo cu CITGO y VALERO encuanto e reapertura y upgrading di e refineria. No kabe duda cu e participacion aki SIN presencia di NI CITGO NI VALERO tabatatin como meta pa e pueblo bai den un esfera di celebracion. Na mes momento e participacion aki a inicia un guera entre gobierno y fraccionan den Staten especialmente den oposicion kende lo ta responsabel pa e re-apertura aki. Gobierno naturalmente ta grita cu ta gracias na nan, MEP ta splica cu nan a reglele cu parlamento Venezolano kaba y Dem Real ta bisa cu ta nan a presenta un mocion cu a inicia e proceso di evaluacion un viaha mas. Notable tabata cu e fraccionan den parlamento a cuminsa grita cu ta gracias na nan, mientras cu ningun di nan NO tabata na altura kiko tabata en e acuerdo cu a jega na djele, solamente gobierno y su team di negociador ta consciente of tabata consciente di esaki !
PPA ta di opinion cu NO a jega e momento pa celebra un re-apertura ainda !! Na prome lugar parlamento lo mester ricibi y discuti e contenido di e acuerdo y e otro partnernan lo mester aproba esaki den nan seno prome cu por bisa cu a aproba un re-apertura di e refineria na un forma responsabel. PPA ta di opinion cu e contenido di e acuerdo ta lo mas importante cu tin pa nos defende interes nacional di pueblo di Aruba. Algun ejempel den esaki ta lo sigiente:
- E danjo pa e ‘clean-up’ ??
Segun informacion un ‘clean-up’ completo di e refineria su tereno tanto riba suelo como ‘sub-suelo’ lo bai costa un 1 billion dollar !! Ora pais Aruba tuma e propiedad aki over pa e prijs symbolico di di $ 1,-- (Un dollar) Aruba ta tuma e responsabilidad pa e ‘clean-up’ cu por Sali 1 billion dollar ora e momento jega. E pregunta ta ….con e ‘garantianan’ den e acuerdo a worde regla pa Aruba NO confronta un situacion asina den un periodo cortico. Pasobra esaki lo nifica cu Aruba lo tin un debe acerca riba nos DEBE NACIONAL di 1 billion dollar cual ta 1.8 billion florin cu lo mester worde paga bek cu ‘fianzanan’ y medidanan atrobe. Pues e contesta con esaki a worde regla ta den e acuerdo cu ‘supuestamente’ a worde jega na djele !
- Garantia di ‘pago’ door di PdVSA ??
Un otro asunto cu segun PPA lo mester worde bon regla den e acuerdo lo ta con pa evita cu CITGO ARUBA NV’s lo por hanja nan den un situacion financiero dificil si acaso PdVSA cu ta donjo di CITGO NO paga nan debernan na tempo pa motibo di e situacionan financiero chaotico di pais Venezuela actualmente. No lubidad sumanan relativamente chikito cu esaki esta e debenan di e pasashi na companianan di aviacion den region NO ta worde paga pa Venezuela pa e problematica di falta di devisas. Con esaki lo a keda regla ?
- Condicionan pa cu uso di LNG gas ?
PPA ta dedica masha atencion na e topico cambio di uso di crudo den uso di gas pa exploita e refineria. Otro camindad companianan cu kier baha nan gasto di exploitacion ta propone esaki na e respective gobiernonan. E gobiernonan na nan turno ta nombra un hala di experto pa studia bao di cual condicion esaki lo por tuma lugar. Aki na Aruba ta gobierno di Aruba a exigi esaki, claro esaki a combini CITGO na prome lugar, pasobra gobierno lo no tabata den un posicion fuerte pa impone un racha di condicion manera den otro pais, prome cu uso di ‘LNG-gas’ por tuma lugar. Aki PPA kier segura e trahadornan den refineria como tambe pueblo di San Nicolas. Segun analisis di PPA ora un explocion di crudo tuma lugar e ta forma un bala y majoria vez ta keda contentra riba e tereno di e refineria, mientras cu exploicionan di LNG-gas ta kana e ta kana bai den cierto direccion y esaki por 1 of 2 km….!! Esaki lo por nifica un peliger pa San Nicolas como cu na otro pais tin un distancia entre e tereno di refineria y e pueblo aki na San Nicolas historicamente e diferencia ta un ‘firewall’ hopi bieuw. E pregunta ta: Kiko ta e condicionan cu gobierno a pone cu CITGO lo mester cumpli cunele prome cu duna nan permiso pa cambia crudo pa LNG-gas ??
- Cantidad di trahador local den refineria ?
Si e acuerdo ta papia di un periodo di entre 15 pa 25 anja di exploita un refineria, anto con a worde regla e ‘seguridad’ pa nos trahadornan local. Ta bon conoci cu Aruba NO tin suficiente trahador pa traha den e refineria. Den e acuerdo a worde regla un school estilo e ‘vocational school di LAGO’ manera Aruba a conoce den pasado ? Pa nos no keda cu un situacion di p.e. 1/5 parti cu ta trahador local y 4/5 parti cu lo mester worde importa. PPA ta boga pa un situacion unda e majoria absoluto lo mester worde forma pa trahador local y si esey no por den comienso anto p/m di un ‘Vocational School’ nos lo por crece bai na esaki dentro un 5/6 anja.
Concluyendo PPA ta di opinion cu e momento pa celebra sigur no a jega ainda y pa un guera di kende a logra menos ainda. Parlamento lo mester ricibi e documentacion, studia esaki y defende interes arubiano na prome lugar, despues cu esaki keda atende y otro interes arubiano anto PPA lo por sostene celebracion di un logro nacional. Pero por lo pronto lo mester hasi ‘huiswerk’ na nivel parlamentario prome.
Aruba, 2 di juni 2018 Lider Politico di PPA
Benny Nisbet, PPA
Expresionnan haci den e articulo aki no necesariamente ta refleha opinion di ArenaPoliti.co
