Rene Herdé (AVP): E siman aki lo trata tres ley importante den parlamento Hulandes
Den e siman aki lo trata tres ley di Reino den Parlamento Hulandes cu ta di importancia pa Aruba. E prome di e tres leynan ta e cambio di e ley cu ta regla nacionalidad Hulandes. Un di e cambionan ta pa extende e periodo di validez di paspoort. Den e reunion aki e delegacion di Aruba lo presenta por lo menos tres amienda cu tin di haci entre otro cu e examen cu hende tin cu haci pa haya paspoort Hulandes.
LEY DI VISUM
E didos ley cu lo trata ta cambionan den e ley di exigi visum pa drenta un di e paisnan di Reino. Parlamento di Aruba tabata hopi critico riba e ley aki. Entre otro parlamento di Aruba a pidi pa gobierno Hulandes tene mas cuenta cu e interesnan di Aruba ora dicidi di exigi visum pa hende di otro pais bishita nos pais. Specialmente pasobra nos pais ta depende asina hopi di turismo, ta necesario pa scucha gobierno y parlamento di Aruba, prome cu exigi visum. E debate aki ta bay ta masha importante. E ley aki lo wordo trata diahuebs merdia 14:30 ora di Hulanda.
PROPOSICION van LAAR/van OVEN
E ditres ley cu lo trata ta e cambio di Statuut pa limita e uso di e instrumento di Algemene Maatregel van Rijksbestuur door di gobierno di Hulanda. E proposicion aki ta bin di e miembro di partido PvdA, sr. Roelof van Laar. Den e debate aki tambe e miembronan di Aruba lo ta hopi critico. Entre otro lo mustra riba e echo cu na Hulanda e instrumento di un Algemen Maatregel van Bestuur ta wordo considera algo totalmente indemocratico pasobra e ta pone parlamento un banda. Pero si ta pa usa esaki den un di e otro paisnan di Reino, esaki no ta wordo considera normal. E contradiccion aki ta un di e criticanan cu lo bin di banda di Aruba.
Cuatro miembro di Parlamento di Aruba lo atende e tratamento den reunion publico aki. Nan ta sra. DEsiree de Sousa Croes, sr. Andin Bikker, sr. Ady Thijsen y sr. Rene Herde. Esaki ta nifica cu tur tres fraccion den Parlamento ta representa pa atende cu e leynan aki.
Expresionnan haci den e articulo aki no necesariamente ta refleha opinion di ArenaPoliti.co