Ta bisto cu Gobierno di Mike Eman kier indoctrina nos pueblo cu hala di proyecto na ultimo momento. Falta apenas 15 luna pa pueblo bay urna pa eligi nan representanten den staten di Aruba. E eleccion venidero un bes mas nos digno pueblo tin cu scoge un partido cu ta goberna pa tur hende biba riba e teritorio chikito cu yama Aruba. Den apenas 8 aña Aruba su pueblo a pasa den temponan dificil hamas bisto den e ultimo 30 añanan di nos Status Aparte. Despues cu Sr. Mike Eman lider di AVP a gaña full un pueblo cu e lo elimina BBO, percura pa siguridad y yuda esnan mas vulnerable den nos comunidad. Awe na 2016 nos tur ta consciente cu Gabinete Mike Eman a destrui nos pais cu nan maneho Neoliberal. Awe nos tur por wak e decadencia social den cada skina di Aruba. Ilegalidad combina cu desempleo ta na ordo di dia. Persecucion politico combina cu abuso di fondonan publico a bira e norma. Hala di coordinadornan combina cu medio di comunicacion comprometi tin tur informacion tranca. Asina mi por sigui menciona e abusonan di Mike y AVP. Nos economia despues cu gobierno a gaba asina tanto cu recordnan den turismo, awo na 2015 no tawata tin crecemento economico segun Banco Central. Pues ban sigui endeuda nos pueblo cu hala di proyecto pa nan lubida riba e mal maneho di 2009 pa 2017. Un debe nacional na 81%, hala di proyecto PPP un total di 2.4 biyon florin y asina mes e burdugonan ta sigui cu mas debe y mas debe. Un mentalidad cu a caba cu varios pais den e region aki, anto ta hustamente pa e mentalidad aki Aruba tin awe mas di 90 Nacionalidad bibando den harmonia, pero cuanto mas un economia manera esun di nos por carga??? Un economia chikito y vulnerable cu tin un peso sumamente grandi rib dje, ocasiona pa Mike y AVP. Negoshinan ta cerando nan porta y keto bay tin un fluho di hende kier bin establece nan mes na Aruba. Nos cuido medico mester atencion riba varios nivel y un porcentahe significante di nos hubentud bayendo den direccion menos progresivo. Respet pa nos leynan ta wordo kibra pa nos propio gobernantenan riba nivelnan hamas bisto. Tin fiesta y abuso di fondonan publico den cada ministerio anto e 13 parlamentarionan (AVP) ta sigui sostene e gobierno ciegamente. Recien ta un parlamentario Sra. Marisol Lopez-Tromp a declara su mes independiente di e gobierno di Mike. E mesun parlamentario aki den apenas tres (3) periodo di gobernacion a declara su mes independiente pa di dos biaha. E biaha aki e la wordo agredi fisicamente pa su propio Vice president di Parlamento Sr. Chris Dammers. Ni cuanto proyecto di klinkers y concreete e Gobierno di Mike purba di indoctrina nos pueblo cun’e, e daño haci den apenas 8 aña lo tuma casi 30 aña pa yega bek unda Gobierno di MEP a lage na 2009. Esaki ta e realidad amargo di nos pais y cada un di nos tin e chens otro aña pa cambia e rumbo destructivo combina cu esclavitud moderno bao e regimen berde di Mike. Solo el pueblo salva el pueblo.

Expresionnan haci den e articulo aki no necesariamente ta refleha opinion di ArenaPoliti.co