Rudy Ricardson (MEP): Medidanan di gobierno y atraco arma a bira e norma bao e regimen berde
Puerto Rico ta un colonia di Merca despues cu e Spaño Europeo a perde esaki na 1898. Awo Puerto Rico ta evalua su status politico na e comité di Decolonizacion di Nacionan Uni. E caso a regresa na e comité, na unda nan a aproba 33 resolucion cu a haci un yamada na Merca pa asumi "su responsabilidad historico" di facilita determinacion liber di e pueblo Puertoriqueño. Nan tin un debe di 72.000 miyon dollar.
Aki na Aruba nos tin un Status Aparte logra pa nos Libertador efm Gilberto François " Betico" Croes. Unda nos tin un staatsinrichting, banco central, moneda propio, parlamento cu varios otro institutonan, idioma materno oficial cu himno y bandera. En fin tur cos pa por ta liber y prospero cual at un derecho universal di tur pueblo.
Despues di 2009 lamentablemente Mike y AVP no a respeta nos Autonomia den Reino Hulandes pero a cuminsa cu un adiccion di gasta y presta placa na un manera iresponsable. Den apenas 4 aña nos debe nacional a wordo redobla. Awe nos debe ta na 81% di GDP alrededor di 5.000 miyon florin combina cu un economia tranca cu "cost of doing business" tin un peso grandi riba nos comercio. Anto manera Mike y AVP a bisa na 2013 AINDA FALTA nan a sigui endeuda nos pueblo cu Proyectonan di Private-Public-Partnership. Aruba su economia ta uno chikito y vulnerable cu no ta recomendable pa nos carga un debe mas di 65% debt- to-ratio GDP. Pues Gobierno di Movimiento Electoral di Pueblo (MEP) a laga esaki na un promedio di 40% di GDP. Ora partido AVP goberna tur cos ta posibel y varios stakeholders den nos comunidad ta acepta esaki cu brasa habri pero e consecuencianan ta bisto den tur skina di Aruba. Medidanan di gobierno y atraco arma a bira e norma bao e regimen berde.
Na Puerto Rico Oscar Lopez a cumpli 35 aña den prison relaciona cu lucha pa independencia, nos na Aruba kier nos Status Aparte wordo respeta atraves di bon gobernacion. E unico solucion nos dilanti ta uno democratico na 2017, manda e gobierno cas pa e daño haci na nos pais y buta nos libertad na peliger den pleno siglo 21.
Expresionnan haci den e articulo aki no necesariamente ta refleha opinion di ArenaPoliti.co