ORANJESTAD- Durante conferencia di prensa diabierna ultimo Prome Minister Eman compaña pa Minister di Turismo Otmar Oduber a splica na placa chikito pakico Aruba no ta un isla cu mester di mas resort All Inclusive. Un pensamento cu ta wordo comparti grandemente den comunidad, sigur si tene na cuenta cu e isla aki ta biba pa hopi aña caba di Tursimo y sa exactamente kico ta come y bebe den e sector aki. E hendenan cu agenda scondi cu ta pone nan interes prome cu esun di Aruba y henter un pueblo, y ta na fabor di e trend pa bende mas edificio di hotel pa bira all inclusive, ta trancando e desaroyo den turismo di Aruba sin ta nodi. Anto aki ta unda gobierno y e minister en cuestion ta bisa cu ta basta. Aruba ni su hendenan merece esaki.

Prome Minister Eman den forma categorico: "Nos a dirigi nos atencion pa haya un turismo cu tin un poder di compra mas halto pa asina percura pa henter e comunidad por comparti di esaki. Nos a haci un di e sacrificionan mas grandi cu tur isla region. Ora nos papia cu nan lidernan, sin excepcion nan ta bisa nos cu nos tabatin hopi curashi y specialmente den e tempo di crisis financiero - gobierno tabatin falta di entrada - pa gobierno a privatisa e entrada mayor cu e tabata haya di roomtax y casino tax y tabatin e disciplina di bisa di no ta bay tuma e placa aki pa hinke den e caha general di gobierno, pero ta pone na disposicion di un entidad cu ta bay maneha nos turismo den forma profesional. Pa asina na tur momento tin e recursonan pa promove e industria turistico di Aruba. Ningun otro isla den Caribe a tuma e decision ni tabatin e curashi aki pa den pleno crisis tuma e decision aki pa garantisa cu turismo sigui florece."

Riba e mesun tono Eman a recorda cu ta gobierno ta percura pa un bunita aeropuerto ora e turista yega Aruba cu ta nan prome impresion. Gobierno a percura pa e bunita infrastructura y un bunita linear park y educacion di nos hobennan den e ramo turistico y ora siguridad banda di hotel ta na peliger, ta gobierno ta esun prome yama pa percura pa drecha e situacion aki. "Awor si bo kier pa e sociedad aki den su totalidad percura pa e ambiente positivo, cu e sociedad ta percura pa e forsa di nos turismo, pa e trankilidad pa asina e turista por disfruta ora e bin Aruba, anto e ora ningun hende por pensa cu mas oro nos tin un industria turistico cu ta bay ta 100% tras di murayanan di hotelnan. Cu un all inclusive e turista ta paga un suma pa keda den un hotel pa un siman, disfruta di e bunita beachnan di Aruba y ta come y bebe loke e hotel ta ofrece. E no a bishita un restaurant, e no a bishita un tienda, e no a core den un taxi, e no a core den un tour. Esaki no ta e industria turistico cu nos kier pa nos dushi Aruba unda nos hendenan ta comparti hunto den e progreso cu e sector turistico ta trece cu ne."

Expresionnan haci den e articulo aki no necesariamente ta refleha opinion di ArenaPoliti.co