Rene Herdé (AVP): Nos ta ofrece "Aruba" como experiencia
![Herde23](/images/2016-press/Herde23.jpg)
"One happy island" ta nos lema!
TUR HOTEL, RESTAURANT Y ATRACCION TA PARTI DI E EXPERIENCIA EY.
Den e debate publico entre diferente organisacionnan comercial y hotelnan, y entre gobierno y sector di hotelnan, e motibo pakico turistanan ta bin Aruba, a keda sin haya suficiente atencion. Nos ta atrae hopi turista y hopi cu ta bolbe bek aña tras di aña. Nos ta score halto riba e atractividad di nos isla. Nos isla ta atrae turista pa motibo di nos bunitesa, pa e trankilidad, seguridad, amabilidad, infrastructura moderno y bon ekipa, un variedad di forma di transporte sigur, manera bon sistema di taxi, auto pa huur y tourbus, trahadornan bon prepara pa nan trabou y cu ta papia diferente idioma, un comunidad conciente di e importancia di turismo, facilidadnan fiscal atractivo y e cooperasion masha bon di gobierno pa tur necesidad di sector di turismo. Banda di esey nos tin un variacion grandi di bon hotel. Hotelnan di luhoso te simpel, pero tur agradabel y sigur. Nos tin un cantidad grandi di restaurant di un nivel masha halto cu a gana premionan internacional pa nan calidad y servicio. Nos isla ta duna un variacion grandi di atraccion, di naturalesa te cu eventonan cultural. Tur esaki ta mas cu solamente e beachnan fabuloso pa cua nos isla ta conoci pe. E turista ta bin Aruba pa tur esaki. Specialmente ora ela bin pa prome biaha y a ripara cu tin hopi mas cu e beachnan so. Ta pesey nos ta atrae hopi turista cu ta bin y bolbe bopin bek aña tras aña. Ora nos haci propaganda den exterior pa turistanan bin Aruba, nos ta ofrece nan henter un isla: "Aruba....One Happy Island". Esaki ta mas, hopi mas cu un hotel bunita, yena cu facilidadnan atractivo y un bon servicio. Ta e combinacion di nos beachnan y tur e hotelnan, restaurantnan, e hendenan y nos atraccionnan, cu ta loke ta atrae turistanan.
LEY
E ley cu gobierno a presenta ta netamente pa sigura cu awor y den futuro, ora nos haci propaganda pa nos isla, cu no ta algun hotel "all inclusive" so ta beneficia di e turista cu bin. Nos tur, unda cu nos ta traha na Aruba, ta ofrece e turista e experiencia special cu ta Aruba. Niun hotel so no por ofrece e variedad di experiencia aki. Pesey e ley ta pa sigura cu nos tur lo sigui gosa di e beneficionan y e entrada cu turismo ta duna. E no ta kita nada di niun compania of grupo. Al contrario, lo sigui mehora y ofrece henter Aruba como experiencia pa tur sigui beneficia den futuro. Tur hotel, tambe esnan cu ya ta "all inclusive", mester ta exitoso y sigui beneficia di e turismo di Aruba.
Expresionnan haci den e articulo aki no necesariamente ta refleha opinion di ArenaPoliti.co