E cambio di ley cu miembro di partido AVP, Donny Rasmijn a presenta den parlamento, ta pa stop uzo di saconan di plastic na Aruba. E cambio di ley aki ta bay wordo trata e siman aki. Fraccion di AVP ta sostene e cambio di ley aki cu ta parti di e programa completo di AVP pa cuido di nos medio ambiente. 

MEDIO AMBIENTE 
E efecto mas grandi di e cambio di ley aki lo ta cu riba caya y den matanan, nos no lo wak e saconan di plastic di tur colo ta colga mas. E saconan aki, e bakinan di "foam" cu ta bende cuminda aden, e bleki y bottelnan di cerbez, ta e sushedad mas grandi di nos naturalesa. E eliminacion di e saconan di plastic ta pesey un paso chikito pero importante pa cuido di nos naturalesa. Rene Herde', lider di e fraccion di AVP ta sostene e ley aki completamente. Ela bisa lo siguiente: "E ley ta un paso mas den cuido sistematico di nos medio ambiente. Nos meta ta pa tin un medio ambiente sin contaminacion. Cu stapnan chikito pero sigur, usando tecnologia y bon experiencian di otro paisnan, nos ta bay yega eynan. Esaki ta un stap tambe den ehecucion di nos programa di partido pa cuido di naturalesa. Mi ta spera cu e cambio di ley aki haya sosten completo den Parlamento. Mi no por imagina mi lo contrario. Den pasado partido MEP tambe a purba pasa un ley similar. Awor Donny a tum'e y e por conta cu nos sosten." 

CUMPRA COS
Loke hende lo ripara ta cu den supermarcado y tiendanan no lo tin saconan di plastic mas pa e productonan cu nan cumpra. Ora di cumpra cos lo mester tin saco di papel of saconan re-usabel. Loke experiencia ta mustra ta cu henden ta cuminsa cana cu saconan re-usabel di nan mes. Loke tambe ta wak ta cu tiendanan mes ta traha saconan di papel of di material duradero cu propaganda di e tienda riba nan. Door di cu e saconan ta re-usabel, ta bale la pena pa inverti den algo cu ta dura mas y pa pone propaganda riba e saconan.

Expresionnan haci den e articulo aki no necesariamente ta refleha opinion di ArenaPoliti.co