Apesar di a ricibi 2.7 biyon florin extra na entrada: 

Constantemente nos ta testigo con e ministernan di Gabinete Mike Eman ta bagatelisa e maneho cu a ser hiba riba tereno di infrastructura di schoolnan durante e 8 añanan di Gabinete Oduber. Tambe cada vez e politiconan envidioso aki kier venena mente di pueblo cu nada a ser haci door di gobierno di MEP pa loke ta construccion y renobacion di schoolnan na Aruba. Echo ta cu  despues di su viahe rond mundo riba custia di pueblo, Prome Minister Mike Eman no kier keda atras y den un conferencia di prensa na cuminsamento di e siman aki el a trece padilanti y gaba cual ta e proyectonan riba tereno di enseñansa cu su gobierno lo bay ehecuta proximamente. Sinembargo den su disertacion e no a menciona net nada di plannan pa construccion di schoolnan NOBO door di su gobierno y ta solamente renobacion di algun school so Gabinete Mike Eman tin intencion di ehecuta den e proximo lunanan prome cu campaña electoral 2017.

Boycott HAVO/VWO school
Tambe gobierno di AVP tin pensa di construi algun cura di school y diferente verkeersplateau den cercania di e schoolnan. Pues algun construccion chikito y necesario, pero cu no ta nada particular pa un Prome Minister sinta gaba cun’e. Echo ta durante 7 aña e gobierno di AVP -  ricibiendo 2.7 biyon florin extra na entrada - NO a construi ningun school nobo den ningun districto di Aruba. Te hasta den nan odio y vengansa contra enseñansa nan a boicotia e school HAVO/VWO na Noord cu Gabinete Oduber tabata tin tur cos cla regla pa construi e school aki, esta bestek, mapa, sitio y financiamento tabata cla. Pero Mike Eman hunto cu Minister Sevinger kendenan no tin ningun stimacion pa nos hubentud escolar a dicidi di realoca y inverti henter e suma pa construccion di e school aki den e proyecto di Tram, cu finalmente a resulta den un fracaso total.

Construccion di schoolnan, 2001-2009
Ta pesey lo ta bon pa un biaha mas recapitula tur e schoolnan NOBO cu MEP a construi durante su 8 añanan di gobernacion y mustra Mike Eman kico kiermen construccion realmente: 1. Construccion di school EPI na Sero Blanco cu a costa 28 miyon florin, 2. Construccion di un Kleuter y Basisschool na Sabana Basora, 3. Construccion di 11 klas extra pa Maria College, 4. Construccion di Colegio Conrado Coronel (Kleuter) na Morgenster, 5. Construccion di Colegio  Conrado Coronel (Basico) na Morgenster, 6. Construccion di school basico na Kudawecha.  Pues 6 proyecto di school grandi y importante a ser construi durante gobernacion 2001-2009 di MEP. Awor e pregunta na Mike Eman ta, cuanto school NOBO bo gobierno a construi durante e ultimo 7 añanan aki?

Expresionnan haci den e articulo aki no necesariamente ta refleha opinion di ArenaPoliti.co