ORANJESTAD - Manera ta custumber maestro y maestranan ya ta trahando den nan klasnan den e dianan aki pa prepara pa ora scol habri otro siman.
"Mi a bolbe di exterior y mesora mi a cuminsa cu bishita algun scol pa mira con e preparacionnan ta bayendo y pa scucha kiko ta e retonan pa e aña escolar nobo. Sin duda algun, e hecho cu e gobierno aki no a construi ningun scol nobo den 7 aña, awe ta dunando masha hopi problema pasobra e klasnan ta birando demasiado grandi. Ora klasnan ta demasiado grandi e maestro no por duna e atencion cu mester na alumnonan cu mester di mas atencion. Si siquiera e maesto por haya un klasse assistent, e por alivia e trabou, pero esey tampoco no ta disponible pasobra no tin fondo. Esey ta lamentable. Pasobra na fin di dia, e docente ta duna di su mes cu alma y cuerpo, pero e mucha ta sali perhudica.
Tambe tin necesidad cresiente na trahadornan social na scolnan, pero esaki tampoco Gobierno ta permiti den e budget.

Mi ta conciente cu Aruba ta den hopi problema financiero y cu no tin placa, pero si mi mira cuanto miyones ta wordo hinca den mas asfalt y mas klinker, mi ta puntra mi mes dicon no por pone algun miyon pa educacion di nos muchanan? Acaso nos muchanan no merese un mihor calidad di enseñansa?

Pa hopi aña caba nos ta den "survival mode" pa loke ta enseñansa, nos ta inverti net suficiente pa sobre bibi. Pero nos no ta inverti den mehora enseñansa mes. Nos no ta inverti den nos docentenan. Den material di scol. Den construi scolnan nobo.

E proyecto di MAVO/HAVO na Noord tampoco ta hayando atencion. Un proyecto cu tabata cla na 2009 y cu tabata tin fondo disponible pe. Sinembargo a toca Aruba e malasuerte na 2009 di a haya un prome minister asina descabeya manera Mike Eman cu a coi tur e placa pa hinke den e proyecto fracasa di tram, perhudicando asina enseñansa di nos muchanan y pueblo di Noord pa 7 aña.

Mi lo sigi cu mi bishitanan na scolnan den e sigiente dianan y despues presenta un rapport na Minister di enseñansa di tur e retonan cu mester wordo atendi cune urgentemente. Nos ta spera cu minister Michelle Hooijboer mustra e interes necesario pa hasi esaki den su ultimo aña como minister, sino pueblo mester warda te otro aña ora MEP ta den gobierno pa duna prioridad na enseñansa" lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co